1 Kɔrɩntɩ Nɩaa 10 - WƖA TENIŊ

Má sɩ́ vʋɩyaa kpaarʋ

¹ Mɩ naambiiriŋ, mɩɩ chɛ dɩ ma liise mʋ yi wɩɩ-la sɩ ŋaa la naabalɩmaba fa sɩɩ to Mosis harɩŋ lɛ. Wɩa leŋe duoŋ-bɩlɩmbaanɩŋ nɛ kʋ kiese tɔ ba kala lɛ, a beŋ ba nyuŋ woruŋ ba kala chol mʋgʋ-bal-la ba sɩɩ yɩrɛ Mʋgʋ-fɩaŋ.

² Duoŋ-bɩlɩmbaaŋ-la sɩ kiese tɔ ba lɛ, ba to mʋga-la chol, ʋ ŋɩɩ nagɛ arɩ ba kala fa fo Wɩɩchʋɔlɛ lɩɩŋ nɛ a ŋaa Mosis harɩ-tooroo.

³ Ba kala dii kʋdiile-la Wɩa sɩ joŋo lo a pɩba nɛ,

⁴ a nyʋa lɩɩ-la sɩ lɩɩ Wɩa teeŋ ma. Lɩɩ-la Wɩa sɩ pɩba dɩ ba nyʋa lɩɩ bʋŋ lɛ nɛ a tuto ba harɩŋ. Kirisito tɩtɩa nɛ saa ŋaa bʋŋ-la.

⁵ Arɩ ŋɩɩ kala, Wɩa tʋɔŋ fa bɩ ba jesiŋ nyuŋ tɔrɔ, ŋɩɩ wɩaa nɛ tɩɩ Wɩa kpʋba tintee-hɩlɩŋ lɛ.

⁶ Wɩaa deemba kala ŋaa wʋmagɩlaa nɛ. Baa dagɛla dɩ la sɩ́ wʋbɔŋŋɔɔ cho arɩ nɩaa deemba fa sɩ choba ŋɩɩ nɛ.

⁷ Má sɩ́ vʋɩyaa kpaarʋ arɩ la naabalɩmaba dɔnsʋŋ fa sɩɩ kpaarʋ ŋɩɩ. Wɩa teniŋ tʋɔŋ ba sɩ, “Nɩalɩŋ hɔnɔ dɩ ba dii kʋdiilee nɛ, aŋ sii gbieli a ŋaa wʋlɩɩlɩŋ.”

⁸ Ʋ bɩra bɩ maga dɩ la ŋaa wʋlɩɩlɩŋ, arɩ la naabalɩmaba dɔnsʋŋ fa sɩɩ ŋaa ŋɩɩ. Ŋɩɩ wɩaa nɛ tɩɩ Wɩa leŋ ba nɩaa bʋɩ mara arɩ batori sii sʋʋ chɛ-bala.

⁹ Ʋ bɩ maga dɩ la magɩsɛ La Tɩɩna. Ba dɔnsʋŋ fa magɩsʋ nɛ, ŋɩɩ nɛ ʋ leŋ dɩŋŋaa dɩmba a kpʋ.

¹⁰ Ba dɔnsʋŋ ma fa gʋgʋrɩmɛ wɩaa nɛ Wɩa teeŋ. Ŋɩɩ nɛ ʋ leŋ ʋ tɩndaara kʋ kpʋba.

¹¹ Wɩa ŋaa wɩaa deemba kala ba lɛ dɩ ʋ chagɩlɛba nɛ. Ama ba saa ŋmʋnsɛ wɩaa deemba bil nɛ a pɩla dɩ ba dɩdagɛla wɩaa nɛ. La hɛ bʋa-la lɛ dʋnɩa sɩ kpagɛ dɩdɛrɩŋ nɛ.

¹² Ŋɩɩ wɩaa nʋʋkala sɩ́ bɩɩna arɩ ʋ chɩŋ woruŋ nɛ wɩalɩŋ ʋ sɩ laa dii lɛ, ʋ maga dɩ ʋ fɩɛlɛ ʋ sɩaa nɛ, dɩ ŋɩɩ dee ʋ jaŋ tel.

¹³ Dɩ Sɩtaanɩ nɛ kʋ magɩsɛ nʋʋ, ʋ maga dɩ ʋ jɩŋ arɩ ŋɩɩ tɩtɩa nɛ Sɩtaanɩ yie mɩmagɩsɛ nʋʋkala. Ama Wɩa kɛŋ wʋtɩtɩɩ nɛ, ʋ bɩ jaŋ sɛɩ dɩ Sɩtaanɩ magɩsɛma a kieli ŋɩɩ ma sɩ jaŋ wuo ŋaa a chɩŋ wɩalɩŋ ma sɩ laa dii lɛ. Bʋa-la Sɩtaanɩ sɩɩ magɩsɛma, Wɩa jaŋ pɩma doluŋ dɩ ma wuo nyalɩmɛ. Ʋ jaŋ dagɛma wombii-la ma sɩ jaŋ to a lɩɩ wɩɩ-la lɛ.

¹⁴ Ŋɩɩ wɩaa, mɩ nandɔŋ-choolie, má lɩɩsɛ ma tɩtɩa vʋɩyaa kpaarɩŋ lɛ.

¹⁵ Mɩ jɩma dɩ ma kɛŋ wʋjɩmɩŋ nɛ, ŋɩɩ nɛ tɩɩ mɩ bʋl wɩɩŋ deeŋ pɩpɩma. Má bɩɩnɛ wɩɩŋ deeŋ woruŋ.

¹⁶ Dɩ la nɩɩ dii kʋdiile-la Kirisito sɩ sɩ dɩ la dii a liliisi ʋ wɩaa, la yie lɔllɛ Wɩa nɛ, aŋ joŋ nyʋnyʋala-la a nyʋa ʋ tʋɔŋ kɩaa. La sɩ ŋaa ŋɩɩ yie dagɛ arɩ a tɩŋ Kirisito chalɩŋ wɩaa la ŋaa kʋbala nɛ. Dɩ la nɛ dii boroboro-la ma, ʋ ŋɩɩ daga arɩ a tɩŋ Kirisito yaraa wɩaa la kala ŋaa kʋbala nɛ.

¹⁷ La yʋga ma nɛ, ama boroboro bala nɛ la yie kaa kpaa dɔŋɔ a didii. Ŋɩɩ wɩaa, la kala ŋaa kʋbala nɛ.

¹⁸ Má bɩɩna mʋ yi Iziral tɩŋŋaa lɛ, ba nɩalɩŋ fa sɩ yie kpʋ pʋsʋŋ a nyɩgɛ a pɩpɩ Wɩa. Dɩ ba nɛ kpʋ pʋna-na kala, ba ma yie pɛ chaŋ nammɩa-la nɛ. Ŋɩɩ daga arɩ nɩalɩŋ arɩ Wɩa pɛ gbaŋa nɛ.

¹⁹ Wɩɩŋ deeŋ mɩ sɩ bʋla, ʋ bʋbʋɔŋ nɛ bɛɛ? Ma bɩɩna mɩ sɩ dɩ vʋɩyaa arɩ vʋɩyaa kʋdiilee ŋaa kɩaa nɛɛ?

²⁰ Aɩ, wɩɩ-la mɩ sɩ bʋla nɛ ŋ-la: Dɩ vʋɩ-kpaaraa nɛ kpaarɛ vʋɩŋ, kʋŋ na-kala ba sɩ kpʋa, ba yie kpʋ pɩ jɩnsɩŋ nɛ. Wɩa dee ba kpʋ pa. Mɩ saa bɩ chɛ dɩ ma dɩ jɩnsɩŋ pɛ gbaŋa.

²¹ Ma dɩ Wɩa bɩ jaŋ wuo pɛ nyʋnyʋala, aŋ ka ma dɩ jɩnsɩŋ ma pɛ nyʋnyʋala. Ma bɩra bɩ jaŋ wuo didii kɩaa Wɩa teeŋ aŋ bɩra mʋ didii jɩnsɩŋ ma teeŋ.

²² Koo laa chɛ dɩ la ŋaa dɩ Wɩa baanɩŋ sii nɛ? Koo la bɩɩna la nɛ dolie kɩɩ Wɩa?

²³ Mɩ jaŋ wuo ŋaa wɩɩkala, ama ba kala bɩ jaŋ wuo pɛ mɩ lɛ. Ba kala bɩ jaŋ wuo ŋaa dɩ mɩ waa Wɩa wɩaa lɛ.

²⁴ Nʋʋkala bɩ maga dɩ ʋ ŋɩŋaa ʋ dʋndʋŋa tʋɔtɔrɛ wɩaa, ama ʋ maga dɩ ʋ ŋɩŋaa wɩalɩŋ sɩɩ tɔrɛ ʋ dɔnsʋŋ tɩŋŋaa ma tʋɔŋ nɛ.

²⁵ Ma jaŋ wuo dii nammɩa-na kala ba sɩɩ yallʋ yɔbɔ lɛ. Má sɩ́ leŋe dɩ ma tʋɔbɩɩnaa walɩmɛma a mʋ tɩgɛ nammɩa-la lɛ, arɩ ma jaŋ wuo dii koo ma bɩ jaŋ wuo dii.

²⁶ Wɩa teniŋ tʋɔŋ ba sɩ, “Dʋnɩa arɩ kʋŋkala sɩ hɛ ʋ tʋɔŋ, La Tɩɩna Wɩa nɛ tɩɩba.”

²⁷ Dɩ nɩɩ-la sɩ bɩ Wɩa ka chʋɔlɛ nɛ yɩrɩŋ dɩ ŋ kʋ dii kɩaa, dɩ ŋ nɛ cho dɩ ŋ mʋa, mʋ a dii, ama sɩ́ leŋe dɩ ŋ tʋɔbɩɩnaa walɩmɩŋ a mʋ tɩgɛ kʋdiile-la lɛ, arɩ ʋ maga dɩ ŋ dii koo ʋ bɩ maga dɩ ŋ dii.

²⁸ Ama dɩ nʋʋ nɛ bʋla pɩŋ arɩ kɩalɩŋ ŋ sɩɩ dii ŋaa vʋɩŋ kɩaa nɛ, ʋ naga arɩ nɩɩ-la sɩ bʋla pɩŋ tʋɔbɩɩnaa ka walɩmʋ nɛ a mʋ tɩgɛ kʋdiile-la lɛ. Ŋɩɩ wɩaa sɩ́ dii.

²⁹ Sɩ́ ŋ tʋɔbɩɩnaa lɛ to a dii, to nɩɩ-la sɩ bʋla pɩŋ tʋɔbɩɩnaa lɛ a sɩ́ dii. Dɩ mɩ nɛ jɩma arɩ mɩ kɛŋ wombiiŋ dɩ mɩ ŋaa wɩɩ, bɛɛ nɛ saa tɩɩ nʋʋ dɔŋ tʋɔbɩɩnaa jaŋ wuo pɔ dɩ mɩ sɩ́ wɩɩ-la ŋaa?

³⁰ Dɩ mɩ nɛ lɔllɛ Wɩa aŋ-na dii kʋdiil-na kala, ɛɛ nɛ saa nʋʋ dɔŋ jaŋ wuo bʋl arɩ mɩ cheye nɛ a tɩŋ kʋdiile-la mɩ sɩ die wɩaa?

³¹ Ŋɩɩ wɩaa kʋŋ na-kala ma sɩɩ dii arɩ kʋŋ na-kala ma sɩɩ nyʋa, wɩɩ-na kala ma sɩɩ ŋaa, má ŋaa ba kala dɩ Wɩa yɩrɩŋ yɩrɛ.

³² Wɩɩ-na kala ma sɩɩ ŋaa lɛ, má pɔ ma tɩtɩa lɛ. Má sɩ́ leŋe dɩ Juu tɩŋŋaa koo nɩalɩŋ sɩ bɩ Juu tɩŋŋaa ŋaa vɩa Wɩa wombiiŋ. Má sɩ́ leŋe dɩ nɩalɩŋ ma sɩ laa Yesu wɩaa dii aa hilimi, dɩ ba dɔŋɔ ma tel.

³³ Má ŋɩŋaa ŋɩɩ mɩ sɩɩ ŋaa. Wɩɩ-na kala mɩ sɩɩ ŋaa, mɩ yie chɩchɛ dɩ mɩ pɛ nʋʋ lɛ nɛ. Mɩ bɩ chɛ dɩ mɩ ŋaa wɩaa a tɔrɛ mɩ tɩtɩa tʋɔŋ. Ama mɩɩ chɛ dɩ mɩ pɛ nɩ-daŋ lɛ nɛ, dɩ Wɩa wuo laaba ta.