Stori abaotem Job 9 - Pijin Bible

Job hemi ansa

¹ Job hemi ansa olsem:

² Hemi tru, mi save long olketa samting ya finis nao. ?Bat watkaen samting nao man save talem fo som wea hemi stret nomoa long ae blong God?

³ Maet samwan hemi laek fo kotem God, bat sapos God hemi askem 1,000 kuestin bae hemi no save ansarem wanfala long olketa.

⁴ God hemi barava waes tumas, an hemi garem evri paoa. An no eniwan save agensim hem, an winim hem.

⁵ Enitaem nomoa hemi save muvum olketa maonten, an taem hemi kros, hemi save brekemdaon olketa maonten nomoa.

⁶ God hemi sendem etkuek fo sekem wol, an hemi muvum olketa faondesin long hem.

⁷ Hemi save tokstrong long san fo no kamap moa long moning, an hemi save stopem olketa sta fo no saen kamdaon long naet.

⁸ Hem seleva nomoa hemi mekem olketa samting wea i stap long skae, an hemi step long olketa wev fo mekem dipsi i kuaet.

⁹ Hem nomoa hemi putum evri grup long sta long skae.

¹⁰ Yumi kanot savegud long olketa bikfala samting wea hemi duim. An olketa mirakol wea hemi mekem, hemi barava plande tumas.

¹¹ Yu save, taem God hemi gopas long mi, bat mi nating save lukim hem nomoa.

¹² Hemi save tekem nomoa enisamting wea hemi laekem. An no eniwan save stopem hem. No eniwan save tok olsem long hem, “!Ei! ?Wanem nao yu duim?”

¹³ Sapos God hemi kros, hemi no stopem kros blong hem. Nomata olketa enemi hu i saet wetem disfala jaean krokodael Rehab, God hemi mekem olketa fo foldaon frant long hem.

¹⁴ ?So hao nao mi save agiu long hem? ?An bae mi talem wanem fo kotem hem?

¹⁵ Nomata mi no duim eni nogud samting bat mi no save talem go eni toktok long hem. Hem nao jaj blong mi, an mi mas askem nomoa fo hemi kaen long mi.

¹⁶ An nomata mi kolem hem kam long kot an hemi kam, mi tingse bae hemi nating lisin kam long mi.

¹⁷ Ating bae hemi sendem kam komburu long mi, an mekem mi garekil fo nating nomoa.

¹⁸ Ya, ating bae hemi no letem mi tekwin lelebet, an bae hemi mekem laef blong mi nogud tumas.

¹⁹ Long saet long strong, mi nating save fosim hem fo duim enisamting. An long saet long kot, no eniwan save stretem wei fo mi agensim hem long kot.

²⁰ Nomata mi gudfala nomoa, ating toktok blong mi bae somaot dat mi fit fo panis. Nomata mi stret nomoa, ating bae God hemi somaot dat mi nogud.

²¹ Nomata mi stret nomoa, bat mi nating kea abaotem laef blong mi. Mi taet fo stap long diskaen laef nao.

²² Nomata man hemi stret o hemi no stret, bat bae God hemi spoelem nomoa tufala evriwan.

²³ Taem trabol hemi mekem eniwan fo dae kuiktaem, God hemi laf nomoa long trabol blong stretfala pipol.

²⁴ Taem kantri hemi long han blong olketa nogud pipol, God hemi mekem olketa jaj fo blaen. ?Sapos i no God wea hemi duim diswan, hu moa save duim?

Job hemi prea go long God

²⁵ Distaem, mi filim olsem olketa de long laef blong mi i gopas kuiktaem nomoa. No eni gudfala samting nomoa hemi hapen long laef blong mi.

²⁶ Laef blong mi hemi gopas kuiktaem olsem kanu wea hemi fas tumas. Hemi gopas kuiktaem tumas olsem igol wea hemi flae kamdaon fo kasholem kaikai blong hem.

²⁷ Nomata mi trae fo hapi an fogetem olketa trabol blong mi, bat mi nating save duim.

²⁸ Mi barava fraet tumas long trabol wea i kasem mi, bikos mi save bae yu sei wea mi nating stret.

²⁹ ?An bikos yu talem finis dat mi fit fo panis, fo wanem nomoa bae mi traehad long laef blong mi?

³⁰ No eni sop hemi fitim fo wasimaot olketa sin blong mi.

³¹ Nomata mi trae fo waswas olsem, ating bae yu torowem mi godaon nomoa long hol wea hemi fulap long mad wea i smel nogud. Den, nomata olketa kaleko blong mi, bat olketa barava les long mi nao.

Job hemi toktok long trifala fren blong hem

³² Sapos God hemi man, bae mi save ansarem hem, an mitufala save go long kot fo stretem disfala raoa blong mitufala.

³³ Bat no eniwan hemi save stap long midol long mitufala, mekem hemi jajem mitufala.

³⁴ An no eniwan hemi save stopem wei wea God hemi panisim mi an mekem mi fraet.

³⁵ Sapos samwan hemi save duim, bae mi no fraet fo tok. Bat bikos hemi no olsem, mi no save toktok.