Stori abaotem Job 8 - Pijin Bible

Fas toktok blong Bildad

¹ Bildad from Sua hemi tok olsem:

² ?Waswe, toktok blong yu hemi finis nao ya? Olketa toktok blong yu hemi olsem win nomoa.

³ God hemi nating save benem stretfala wei fo kamap kruket. God hu hemi garem evri paoa hemi nating spoelem wanem hemi stret.

⁴ Olketa pikinini blong yu nao i bin sin agensim God. Dastawe nao hemi panisim olketa.

⁵ Yu mas luk go long God hu hemi garem evri paoa, an askem hem fo helpem yu.

⁶ Sapos laef blong yu hemi gud an hemi stret, bae hemi stat fo helpem yu. An evrisamting wea yu garem fastaem, bae hemi givimbaek long yu.

⁷ An nomata distaem laef blong yu hemi luk olsem samting nating nomoa, bae hemi fulap long staka samting wea bae hemi givim long yu.

⁸ Hemi gud fo yu tingabaotem olketa waes toktok from bifoa kam, an save long olketa toktok blong olketa olo.

⁹ Laef blong yumi hemi sot nomoa, an yumi nating save long enisamting. Ya, laef blong yumi hemi go pas nomoa olsem sado.

¹⁰ Hemi gud fo yu herem olketa waes toktok blong olketa olo blong yumi bifoa. Olketa olo save talemaot olketa gud samting fo yu.

¹¹ Olketa tolfala gras wea i grou nomoa insaet long wata, yumi nating save lukim olketa grou long drae eria.

¹² Taem wata hemi drae, bae olketa kaen gras nao i faswan fo dae.

¹³ Olketa pipol hu i no tingim God bae olketa dae kuiktaem tu olsem diskaen gras. Olketa hu i lusim God, bae olketa lus tu olsem kaen gras ya wea hemi no garem wata.

¹⁴ Olketa pipol ya i trastem nomoa wanem hemi nating strong nomoa. Hemi save brek isi nomoa olsem string long haos blong spaeda.

¹⁵ Taem man hemi trastem olketa samting blong hem, hemi olsem hemi holem string long haos blong spaeda go-go hemi brekem an man hem foldaon.

¹⁶ Olketa man nogud i kamap strong kuiktaem olsem ravis gras wea i grou insaet long niu gaden. Hemi grou evriwea taem san hemi saen gudfala long hem.

¹⁷ Olketa rut blong ravis gras ya i raonem olketa bikfala ston, an holemtaet nao.

¹⁸ Bat taem eniwan hemi pulumaot ravis gras ya, bae no eniwan hemi luksave nomoa long ples wea hemi bin grou long hem.

¹⁹ Wei wea olketa nogud pipol i lus olsem, hem nomoa hemi hapi blong olketa nao. Taem olketa lus bae olketa narafala pipol i kamap fo sensim olketa.

²⁰ Yumi save dat God hemi no les long olketa stretfala pipol, an hemi no save helpem olketa nogud pipol.

²¹ Bae hemi mekem yu fo la-laf moa, an bae yu singaot bikfala bikos yu hapi.

²² God bae hemi mekem olketa enemi blong yu fo sem, an bae hemi spoelem finis evri ples blong olketa nogud pipol.