Stori abaotem Job 6 - Pijin Bible

Job hemi komplen go long trifala fren blong hem

¹ Job hemi tok olsem:

² Sapos mi putum wei wea mi filnogud an trabol antap long wanfala skel,

³ bae hemi hevi moa winim hevi blong evri sanbis long saetsi. Dastawe mi tok krangge.

⁴ God hu hemi garem evri paoa hemi mekem mi fo safa olsem man wea olketa sutim hem long olketa poesen aro. Poesen blong aro ya hemi go insaet long laef blong mi. Mi fraetem tumas an safa nao long olketa nogud trabol wea God hemi sendem agensim mi.

⁵ ?Waswe, dongki save singaot nogud taem hemi kaikaim gras? ?Waswe, buluka save meknoes taem hemi garem kaikai? Nomoa, taem olketa garem kaikai, olketa i hapi.

⁶ ?Hu nao laekem kaikai wea hemi olsem wata nating sapos hemi no garem eni solt long hem? ?Hu nao save kaikaim drae disfala flaoa blong sego pam?

⁷ Mi nating laekem diskaen kaikai nomoa, hemi mekem mi toraot.

Job hemi laekem God fo finisim laef blong hem

⁸ ?Waswe nao God hemi no save givim kam samting wea mi askem? ?Waswe nao hemi no save ansarem kam prea blong mi?

⁹ Mi laekem hem fo kilim mi dae. Mi laekem hem fo katemaot laef blong mi.

¹⁰ An sapos hemi duim diswan, nomata mi barava filnogud tumas bae mi hapi fogud bikos mi no tokagensim toktok blong God hu hemi holi tumas.

¹¹ Mi nating strong. ?So waswe nao mi gohed fo stap olsem nomoa? Laef blong mi hemi yusles finis. ?Fo wanem nao mi save weit long hem?

¹² ?Waswe, mi strong olsem ston? ?Waswe, bodi blong mi hemi aean?

¹³ Hemi tru ya, mi no fit fo sevem laef blong mi seleva. No eniwan nao hem i stap wea hemi save helpem mi.

Job hemi komplen abaotem trifala fren blong hem

¹⁴ Man wea hemi barava filnogud, nomata hemi lusim wei fo tinghae long God hu hemi garem evri paoa, hemi nidim tumas olketa fren fo lavem hem.

¹⁵ Bat mi no save trastem olketa fren blong mi. Olketa ya i olsem wanfala smol riva wea hemi drae taem no eni ren hemi kam.

¹⁶ Taem snou antap long olketa hil hemi ranaot, smol riva olsem hemi fulap long wata an hemi ran bikfala.

¹⁷ Bat long taem blong biksan, wata ya hemi finis, an smol riva olsem hemi kamap barava drae.

¹⁸ Taem olketa wata i drae, olketa bisnis man wea i go long kamel olketa mas lusim rod fo go lukaotem wata insaet long drae eria, go-go olketa dae nomoa.

¹⁹ Olketa ya from Seba an Tema, i gohed fo lukaotem wata.

²⁰ Bat taem olketa kasem saet long olketa smolfala wata, olketa barava givap nao taem olketa lukim wata ya i drae nao.

²¹ Yutrifala i nating helpem mi nomoa. Yutrifala kamap olsem nomoa olketa drae riva ya. Yutrifala lukim bikfala trabol blong mi, an yufala fraet long hem.

²² Mi no askem yutrifala fo givim eni presen long mi. Mi no talem yutrifala fo peim eniwan fo nilam hem, mekem hemi helpem mi.

²³ Mi nating talem yufala nomoa fo kam peim mi aot from olketa enemi blong mi. An mi no askem yutrifala fo sevem mi from han blong olketa ravis man.

Job hemi talem dat hemi stret nomoa

²⁴ Oraet, yutrifala trae fo tisim mi, an bae mi stap kuaet. Yutrifala mas mekem mi save long rong blong mi.

²⁵ Stretfala toktok hemi save mekem man fo filpein. Bat toktok blong yutrifala hemi krangge nomoa.

²⁶ ?Waswe, yutrifala tingse toktok blong mi hemi olsem win nomoa? ?Waswe, yutrifala laek fo stretem toktok blong mi taem mi filnogud?

²⁷ Hemi luk olsem yutrifala pleim gem fo winim pikinini wea i no garem dadi, mekem hemi kamap slev blong yufala. An hemi luk olsem wea yutrifala laek fo salem fren blong yufala.

²⁸ !Yutrifala mas luk kam long mi. Mi nating laea long yutrifala.

²⁹ Yutrifala mas tingting moa long mi. Mi laekem yutrifala fo no duim eni rong samting. Yutrifala mas tingim mi moa, bikos nogud yutrifala no lukim stretfala wei blong mi.

³⁰ ?Waswe, mi save laea? !Nomoa nao! ?Waswe, yutrifala tingse mi no save abaotem trabol? !Nomoa nao!