Stori abaotem Job 5 - Pijin Bible

Elifas hemi talem dat Job nao hemi rong

¹ Job, yu singaot go, mekem yumi lukim hu nao bae kam fo helpem yu. ?Waswe, hu nao long olketa enjel bae yu kolem fo helpem yu ya?

² Wei fo filnogud bae kilim krangge man. Joles tingting bae spoelem man i no garem save.

³ Mi lukim finis krangge man wea hemi gohed fo stap gudfala nomoa, bat wea mi toktok fo mekem trabol kam kasem ples blong hem.

⁴ Olketa pikinini blong hem i nating save stap sef moa. An no eniwan save helpem olketa long kot.

⁵ An olketa pipol hu i hanggre bae tekem kaikai long gaden blong olketa. Nomata olketa kaikai wea i grou long midol long olketa ropnila, bae olketa tekem tu. An olketa gridi pipol i tekem risis blong hem.

⁶ Ravis wei no save grou insaet long gaden, an trabol no save grou kamap from graon.

⁷ Man nao hemi mekem trabol fo kasem hem seleva. Ya, hemi tru olsem faea wea hemi laet goap.

Elifas hemi advaesim Job

⁸ Sapos mi olsem yu, bae mi mas tane go long God nao. An mi mas talem trabol blong mi long hem.

⁹ God nao hemi duim olketa bikfala samting wea man hemi no save minim. Olketa mirakol wea hemi mekem, no eniwan save kaontem nao.

¹⁰ Hemi nao hemi sendem kamdaon ren long graon, an hemi wata long olketa gaden.

¹¹ God nao hemi haemapem olketa hu i hambol. An hemi mekem olketa pipol hu i sore an krae, fo kamap hapi moa.

¹² Hemi spoelem olketa plan blong olketa ravis man. An mekem olketa ya fo no kasem wanem olketa laekem.

¹³ Hemi mekem olketa trik blong pipol hu i tingse i save, fo spoelem olketa seleva. An hemi spoelem olketa ravis plan blong olketa ya.

¹⁴ An nomata long midol long de, hemi mekem tudak hemi kavaremap olketa ya. So olketa no save lukluk olsem wea hemi midol long naet.

¹⁵ Bat God hemi sevem olketa pua pipol from ravis toktok blong nogud pipol. An hemi sevem olketa hu i no garem enisamting, from pipol hu i strong tumas.

¹⁶ So, God hemi mekem tingting blong pua pipol fo kamap strong moa, an hemi satem maos blong olketa ravis pipol.

Elifas hemi talem Job wea God bae helpem hem

¹⁷ Man wea God hemi stretem laef blong hem, hemi save hapi. So taem God hu hemi garem evri paoa hemi stretem yu, yu mas no les long hem.

¹⁸ Hemi save mekem man fo garem soa, bat hemi save putum meresin long hem tu. Hemi save mekem man fo garekil, bat hemi save mekem hem gud baek moa.

¹⁹ Evritaem nomoa bae hemi sevem yu from trabol. Nomata plande nogud samting i kasem yu bae hemi lukaftarem yu.

²⁰ Sapos hadtaem long kaikai hemi kamap, bae hemi kipim yu laef. An long taem blong faet, bae hemi gadem yu from dae.

²¹ God bae hemi sevem yu from olketa laea wea hemi save spoelem yu. An bae hemi sevem yu taem olketa trabol fo spoelem yu i kam.

²² Ya, long taem blong bikfala trabol, an hadtaem fo garem kaikai, bae yu hapi an laf nomoa. An bae yu no wari long olketa wael animol.

²³ Ples wea bae yu mekem gaden long hem, bae hemi no garem eni ston long hem. An olketa wael animol bae i no kam fo kilim yu dae.

²⁴ Bae yu save stap long piis long ples blong yu. Taem yu sekap long olketa sipsip blong yu, bae yu save lukim dat olketa stap gud nomoa.

²⁵ Olketa pikinini blong yu an olketa grani blong yu, bae i save plande fogud olsem olketa lif blong gras.

²⁶ Bae yu save laef gudfala go-go yu barava olo fogud, olsem kaikai blong wit wea hemi grou gudfala long gaden go kasem taem wea hemi fit fo tekemaot.

²⁷ Job, mifala bin luklukgud long olketa samting ya, an hemi tru tumas. Yu mas herem olketa toktok ya an falom.