Stori abaotem Job 42 - Pijin Bible

Job hemi ansa go long Yawe

¹ Job hemi tok olsem long Yawe:

² Mi save dat yu garem evri paoa, an yu save duim nomoa evrisamting wea yu planem.

³ Yu bin ask olsem long mi, ?Hu nao hemi haedem plan blong mi long tingting wea hemi tudak? Hemi tru nao, mi bin tokabaotem olketa samting wea mi no minim save, an olketa samting wea i winim save blong mi.

⁴ Yu tok olsem long mi, Yu lisin kam gudfala taem mi toktok. Yu mas ansarem kam olketa kuestin blong mi.

⁵ Lastaem, mi herem nomoa wanem pipol i talem abaotem yu, bat distaem, mi lukim yu nao long ae blong mi seleva.

⁶ So, mi les tumas long mi seleva nao, an mi sidaon insaet long asis an long dast fo somaot dat mi sensim tingting blong mi.

Las toktok

⁷ Bihaen Yawe hemi toktok finis wetem Job, hemi tok olsem long Elifas from Teman, “Mi kros tumas long yu an tufala fren blong yu ya, bikos yufala nating toktru abaotem mi, olsem toktok blong wakaman blong mi Job.

⁸ So yufala mas tekem go seven man buluka wetem seven man sipsip, an go long Job. Den, yufala mas kilim olketa animol ya fo mekem sakrifaes wea hemi barava bone. An Job, wakaman blong mi, nao bae hemi prea kam long mi fo yufala. An bae mi herem prea blong hem. Nomata yufala rong finis, bat bae mi no panisim yufala. Yufala nating tok stret abaotem mi olsem wea Job bin duim.”

⁹ So, Elifas, an Bildad an Sofa i duim nao wanem Yawe bin talem long trifala fo duim. An hemi ansarem nao prea blong Job.

¹⁰ Bihaen long taem Job hemi prea finis fo trifala ya, Yawe hemi mekem hem fo kamap wanfala risman moa. Hemi dabolem evrisamting wea hemi bin garem fastaem.

¹¹ Evri brata blong Job wetem olketa sista blong hem, an olketa fren blong hem blong bifoa, i kam fo visitim hem. An olketa mekem wanfala bikfala kaikai long haos blong hem. Olketa talem dat olketa sore tumas long hem, an strongim moa tingting blong hem from olketa trabol wea Yawe bin mekem fo kasem hem. An olketa evriwan i givim silva seleni an wanfala gol ring long hem.

¹² Yawe hemi blesim disfala las pat long laef blong Job, winim fas pat long laef blong hem. Hemi mekem Job fo garem 14,000 sipsip, an 6,000 kamel, an 2,000 buluka, an 1,000 dongki.

¹³ Hemi garem tu sevenfala san an trifala dota.

¹⁴ Hemi kolem disfala fas dota blong hem ya Jimaema, an mektu hemi Kesia, an laswan hemi Keren-Hapuk.

¹⁵ No eni woman moa long eria blong olketa hemi barava naesbola winim trifala ya. An Job hemi givim lan long trifala ya, barava olsem wea hemi givim long olketa brata blong trifala ya.

¹⁶ Bihaen long datfala taem, Job hemi stap fo 140 yia moa. Hemi laef go-go hemi lukim olketa smol grani blong hem, wetem olketa pikinini blong olketa tu.

¹⁷ Taem hemi dae, hemi barava olo fogud.