Stori abaotem Job 41 - Pijin Bible

¹ Yu no save hukum bikfala animol ya Leviatan, an yu no save taengem tang blong hem long rop.

² Yu no save putum rop fo gotru long nous blong hem, o mekem huk fo gotru long maos blong hem.

³ ?Sapos yu save kasholem hem, waswe, yu tingse bae hemi askem yu fo letem hem go fri? ?O, yu tingse bae hemi krae long yu fo yu sore long hem?

⁴ Hemi no save agri fo kamap slev blong yu olowe long laef blong yu.

⁵ ?Waswe, yu tingse yu save plei wetem hem olsem wanfala parot wea yu fidim? Yu no save taengem hem long rop fo olketa gele blong yu i plei wetem hem.

⁶ ?Waswe, yu tingse olketa maket man bae i toktok tugeta fo putum praes long hem? Olketa bisnisman i no save katem hem long olketa smolfala pisis fo salem.

⁷ ?Yu tingse yu save spiarem hem? Hemi barava had tumas fo yu spiarem hem long hed.

⁸ Sapos yu trae fo holem hem, bae hemi faetem yu fo kilim yu dae. an bae yu no save fogetem wanem hemi duim long yu.

⁹ Hemi nating tru sapos eniwan hemi tingse hemi save winim Leviatan. Taem eni man hemi lukim disfala maeti animol, bae hemi fraet fogud an seksek tumas.

¹⁰ No eniwan hemi fitim fo faet agensim disfala barava bikfala wael animol ya. Sapos hemi tru, no eniwan save kam agensim mi ya.

¹¹ ?Hu nao save tok agensim mi mekem mi stretem samting? No eniwan nao, bikos mi nao mi kontrolem evrisamting long disfala wol.

¹² Bae mi talem yu abaotem olketa lek blong hem, an abaotem paoa blong bodi blong hem.

¹³ No eniwan save aotem skin blong hem. Ya, no eniwan save katem skin blong hem wea hemi olsem aean.

¹⁴ No eniwan hemi fitim fo mekem hem openem maos blong hem. Taem eniwan hemi lukim tit blong hem, bae hemi barava fraet fogud.

¹⁵ Long baeksaet blong hem, olketa samting olsem olketa pis aean nao olketa barava kavaremap long hem.

¹⁶ Olketa pat ya i joen strong tumas, an nomata lelebet win hemi no save gotru.

¹⁷ Ya, olketa i joen barava strong tumas, an no enisamting save aotem olketa.

¹⁸ Tufala ae blong hem i saen fogud olsem san taem hemi kamap long moning. An taem hemi snis, laet save kamaot long nous blong hem.

¹⁹ Taem hemi openem maos blong hem, faea hemi kamaot. An olketa smolfala pis faea hemi gohed fo sut kamaot from maos blong hem.

²⁰ Smok hemi gohed fo kamaot bikfala long nous blong hem. Smok ya hemi olsem smok long drae gras wea hemi bone, o pot long hot wata wea hemi boela bikfala.

²¹ Win blong hem hemi save laetem olketa faea, an faea hemi sut kamaot long maos blong hem.

²² Nek blong hem hemi barava strong tumas, an evriwan wea i lukim hem, i barava fraet fogud.

²³ Evri pat long bodi blong hem hemi had tumas, an hemi barava strong fogud olsem aean.

²⁴ Sest blong hem hemi barava strong fogud olsem strongfala ston.

²⁵ Taem hemi stanap, olketa strong man i fraet fogud. Ya, taem hemi jam olobaot fo faet, olketa fraet an ranawe.

²⁶ No eni naef fo faet save mekem hem garekil. An no enikaen spia, o aro, save sut go long hem.

²⁷ Long hem, aean spia hemi olsem nomoa wanfala lif long gras, an bras aro hemi olsem nomoa stik wea hemi roten finis.

²⁸ No eni aro save mekem hem ranawe, an eni ston wea man sutim long hem, hemi olsem nomoa dast.

²⁹ Disfala stik fo faet, hemi olsem nomoa wanfala pis gras. An taem olketa pipol i trae fo spiarem hem, hemi laf nomoa long olketa.

³⁰ Olketa skel long bel blong hem i sap olsem olketa pis botol wea hemi brek. Taem hemi krol go long graon hemi barava brekem graon ya.

³¹ Taem hemi suim insaet long dipsi, solwata hemi kamap olsem wata wea hemi boela bikfala insaet long pot.

³² An taem hemi muv go long solwata, plande wev nao i kamaot bihaen long hem, olsem wanfala sip wea hemi go kuiktaem long si.

³³ No enisamting long wol nao hemi luk olsem hem, an hemi nating fraet long enisamting.

³⁴ Nomata olketa animol wea i strong tumas, bat hemi lukdaon nomoa long olketa. Hem nao hemi sif long evri wael animol.