Stori abaotem Job 38 - Pijin Bible

Yawe hemi toktok long Job

¹ Nao Yawe hemi ansarem Job from wanfala komburu. Hemi tok olsem:

² ?Hu nao hemi haedem plan blong mi long tingting wea hemi tudak? Toktok blong yu hemi somaot wea yu nating save nomoa long enisamting.

³ Sapos yu wanfala man tru, yu stanap, an ansarem kam olketa kuestin blong mi.

⁴ ?Yu stap long wea, taem mi mekem wol ya? Sapos yu save long olketa samting ya, yu talem kam long mi.

⁵ ?Hu nao hemi makem saes blong disfala wol? ?Hu nao hemi holem rula fo makem saes blong hem? ?Waswe, yu no save ya?

^6-7 Long taem mi putum faondesin an kona ston wea i holemap wol ya, olketa sta i hapi tumas an singsing tugeta, an olketa enjel long heven tu i singaot. ?Waswe, yu save tu long olketa faondesin an kona ston ya?

⁸ ?Hu nao mekem ples blong solwata taem hemi bon kam long ples blong hem?

⁹ Mi nao mi kavaremap solwata ya wetem olketa klaod wea i tudak.

¹⁰ Mi nao mi putum mak wea solwata save kam kasem. Ya, hemi olsem wea mi putum wanfala wolston, fo satem dipsi fo no kamap long lan.

¹¹ Mi tok olsem long hem, “Yu save kam kasem disfala ples an yu stop nao. Paoa blong yu hemi save kamap kasem ples ya an finis nao.”

¹² ?Waswe, yu bin talem delaet fo kamap enitaem long laef blong yu? ?Waswe, hemi herem yu?

¹³ ?Waswe, yu save tokstrong long san fo sendem laet fo go akros long wol, an sekemaot olketa ravis pipol from olketa ples wea olketa haed long hem?

¹⁴ Taem delaet hemi kamap, yumi save luksave dat olketa hil an olketa vali i kamaot klia fogud. Olketa i olsem wanfala kaleko wea hemi barava luknaes, an olketa i olsem wanfala nambawan kaving.

¹⁵ Laet blong san, hemi braet tumas fo olketa nogud pipol. Delaet hemi stopem olketa ya fo no duim olketa ravis samting.

¹⁶ ?Waswe, enitaem yet, yu bin kasem ples long botom blong si, o yu bin wakabaot finis long botom blong dipsi?

¹⁷ ?Waswe, yu bin lukim finis, doa long ples ya blong olketa man dae wea hemi barava tudak tumas?

¹⁸ ?Waswe, yu save long bikfala saes blong disfala wol? Sapos yu save, yu talem kam long mi.

¹⁹ ?Waswe, yu save long ples wea laet hemi kamaot long hem, o ples wea tudak hemi stat kam long hem?

²⁰ ?Waswe, yu save som nomoa, ples wea tufala mas go kasem? ?Waswe, yu save nomoa long rod wea tufala mas gobaek falom?

²¹ Maewat, ating yu save long evrisamting, bikos yu bon finis long taem wea mi mekem disfala wol. !Oloketa! Yu mas save, bikos yu nao yu barava olo fogud.

²² ?Waswe, yu kasem finis haos wea mi kipim snou an ston blong aes?

²³ Mi kipim olketa samting ya, redi nomoa fo yusim long taem blong trabol an long faet.

²⁴ ?Waswe, yu kasem finis ples wea laetning hemi kamaot long hem? ?Waswe, yu kasem finis ples wea ist win hemi kamap long hem?

²⁵ ?Hu nao hemi mekem wei wea ren hemi foldaon kam falom? ?An hu nao hemi kliarem rod mekem tanda hemi bosta falom?

²⁶ ?Hu nao hemi givim wata long drae eria wea no eniwan i stap long hem?

²⁷ ?Ya, hu nao hemi mekem ren hemi foldaon long drae eria, fo mekem gras hemi grou?

²⁸ ?Waswe, ren an diu, tufala garem eni dadi?

²⁹ ?Waswe, aes an snou, tufala garem eni mami?

³⁰ ?Hu nao hemi mekem wata hemi kamap aes wea hemi strong olsem ston? ?Hu nao save mekem antap long wata tu hemi kamap aes?

³¹ ?Waswe, yu save taengem tugeta nomoa, olketa grup long sta? ?Waswe, yu save tekemaot nomoa rop wea i joenem tugeta long olketa sta?

³² ?Waswe, yu save makem nomoa barava taem wea olketa sta mas kamaot long hem? ?Waswe, yu save mekem olketa grup long sta i go stap long ples blong olketa?

³³ ?Waswe, yu savegud long olketa lo wea i kontrolem olketa samting long skae? ?Waswe, yu save yusim nomoa olketa lo ya fo rul long disfala wol?

³⁴ ?Waswe, yu save singaot go nomoa long olketa klaod, mekem ren hemi foldaon kam long yu go-go yu tuwet nao?

³⁵ ?Waswe, yu save tokstrong nomoa long olketa laetning fo laet? ?Waswe, yu tingse olketa laetning save kam an tok olsem nomoa long yu, “Masta mifala long hia nao” ya?

³⁶ ?Hu nao hemi mekem olketa klaod fo kam tugeta mekem hemi ren? ?An hu nao hemi mekem wata fo goap olsem smok fo mekem olketa ren klaod ya?

³⁷ ?Hu nao hemi waes, mekem hemi save kaontem olketa klaod long skae? ?Hu nao hemi save kapsaetem kamdaon ren

³⁸ fo watarem drae graon wea hemi had tumas?

^39-40 ?Waswe, yu save handem nomoa kaikai fo olketa laeon, taem olketa hanggre tumas an weit fo kaikai insaet long kev?

⁴¹ ?Hu nao hemi givim kaikai long olketa bikfala bed taem olketa hanggre an lukaotem kaikai? ?Ya, hu nao hemi fidim pikinini blong olketa bed ya taem olketa hanggre an krae kam long mi?