Stori abaotem Job 37 - Pijin Bible

Elihu hemi gohed fo toktok

¹ Komburu olsem hemi mekem haat blong mi barava seksek fogud. Ya, hemi ja-jam tumas.

² Yufala evriwan mas lisin long voes blong God wea hemi kamaot olsem tanda.

³ Hemi sutim go laetning akros long skae, stat long wan saet go kasem nara saet.

⁴ Bihaen, voes blong hem hemi saon kam olsem wanfala bikfala tanda. An evritaem yufala herem voes blong hem, hemi somaot paoa blong hem long laetning ya.

⁵ Taem God hemi tokstrong long tanda, evriwan i sapraes long hem. An hemi gohed fo duim olketa bikfala samting wea yumi no save minim save.

⁶ Hemi talem snou fo foldaon kam long graon, an hemi tok long ren fo ren kamdaon bikfala.

⁷ Hemi stopem waka blong olketa pipol, mekem olketa luksave long olketa samting hemi bin duim.

⁸ Olketa wael animol i go haed insaet long olketa hol blong olketa.

⁹ Oltaem komburu hemi kamaot from ples blong hem, an kol win hemi blou kam bikfala tu.

¹⁰ Taem God hemi blou go nomoa wata hemi kamap aes wea hemi barava strong fogud.

¹¹ Hemi mekem laetning hemi gohed fo laet akros long olketa klaod wea hemi fulapem olketa long wata.

¹² Olketa klaod ya i goraon long wol falom plan blong God nao, an olketa duim evrisamting wea hemi talem long olketa.

¹³ Samfala taem hemi sendem kam ren fo watarem graon an somaot lav blong hem. Bat hemi save sendem kam tu fo panisim olketa pipol.

¹⁴ Job, yu mas lisin kam fo lelebet taem. Yu mas tingim olketa nambawan samting God hemi duim.

¹⁵ ?Waswe, yu save hao nao God hemi kontrolem olketa klaod, an hao nao hemi mekem laetning saen akros long skae?

¹⁶ ?Waswe, yu save tu hao nao God hemi yusim nambawan save blong hem, fo mekem olketa klaod flot long skae?

¹⁷ Taem hot win long saot hemi blou kam, bae yu filhot an filnogud tumas long olketa kaleko wea yu werem.

¹⁸ ?Waswe, long taem olsem, yu save helpem God fo putumap skae long antap olsem wanfala glas wea hemi saen?

¹⁹ Yu mas mekem mifala save long wanem bae mifala talem long God fo yu. Mifala no save mekem kes blong yu bikos mifala barava tudak nao.

²⁰ Mi fraet fo tok wetem God, bikos mi no laek fo dae.

²¹ No eniwan save lukstrong long san taem skae hemi klia, bikos san hemi barava saen strong fogud.

²² Laet wea hemi saen bikfala tumas olsem gol, hemi saen kam long not. An disfala saen blong bikfala paoa blong God, hemi mekem yumi barava fraet fogud.

²³ Paoa blong God hu hemi garem evri paoa, hemi bikfala tumas, yumi no save go kolsap long hem. Bikos wei blong hem hemi barava stret fogud, hemi no save spoelem eniwan.

²⁴ Dastawe evriwan i tinghae long hem, an olketa hu i waes i barava tinghae long hem.