Stori abaotem Job 36 - Pijin Bible

¹ Elihu hemi gohed fo tok olsem:

² Yu mas weit, an lisin lelebet moa fo herem olketa samting wea mi wande talem fo God.

³ Mi garem save blong mi from olketa farawe ples. An bae mi yusim disfala save, fo somaot dat God hu hemi mekem mi, hemi stret fogud.

⁴ Evri toktok wea mi talem long yu i no laea. Mi nao mi barava save tumas.

⁵ God hemi garem evri paoa, bat hemi no les long eniwan. Hemi barava save long evrisamting.

⁶ Hemi mekem olketa ravis man fo dae nomoa, bat hemi mekem olketa puaman fo garem raet blong olketa.

⁷ God hemi lukaftarem olketa pipol hu i stret, an hemi mekem olketa fo kamap bikman, an hemi mekhae long olketa.

⁸ Bat sapos olketa stap long sen wea i taengem lek blong olketa, an olketa safa,

⁹ oraet, God bae hemi somaot hao nao olketa bin sin an praod tumas.

¹⁰ Hemi mekem olketa fo lisin gudfala taem hemi stretem olketa. An hemi tokstrong long olketa fo tane kambaek an lusim olketa ravis wei blong olketa.

¹¹ Sapos olketa obeim God an olketa waka gudfala fo hem, bae olketa garem gudfala laef, an stap long piis go-go olketa i olo.

¹² Bat sapos olketa no lisin gudfala, bae olketa dae nomoa long faet bikos olketa no garem save.

¹³ Olketa hu i no trastem God, i filkros tumas nomoa. An nomata God hemi stretem olketa, olketa nating prea nomoa long hem fo hemi helpem olketa.

¹⁴ Olketa dae taem olketa yangfala yet, bikos olketa durong long olketa tambuhaos blong olketa narafala god.

¹⁵ God hemi letem trabol kasem olketa pipol, fo sevem olketa. Hemi letem olketa pipol fo safa, fo mekem olketa lisin long hem.

¹⁶ God bae hemi mekem yu kamaot from trabol, an bae hemi lukaftarem yu long gudfala ples. Bae hemi fulumapem tebol blong yu long olketa nambawan kaikai.

¹⁷ Bat distaem, laef blong yu hemi fulap long panis, an olketa samting fo stretem yu hemi kasem yu.

¹⁸ Yu mas lukaot, nogud olketa pipol i nilam yu long seleni. Nogud olketa gudfala samting bae lidim yu fo go rong from stretfala wei blong God.

¹⁹ Strong blong yu, an risis blong yu i nating fitim fo helpem yu taem trabol hemi kasem yu.

²⁰ Yu no weitem tudak, mekem yu lus long hem.

²¹ Yu mas no falom olketa ravis wei. God hemi letem yu fo safa mekem yu no falom olketa ravis wei ya.

²² Yu save, God hemi barava garem evri paoa. Hemi wanfala nambawan tisa, winim evri narafala tisa.

²³ No eniwan save talem God wanem fo duim. An no eniwan save talem God wea hemi mekem samting nogud.

²⁴ Oltaem, yu mas preisim waka blong hem, olsem olketa pipol duim long singsing.

²⁵ Evriwan i lukim finis olketa samting wea God hemi duim, bat yumi save luk farawe go long olketa samting nomoa.

²⁶ Yumi kanot save gudfala long paoa blong God, an yumi nating save kaontem olketa yia blong hem.

²⁷ God nao hemi mekem wata fo goap, an hemi mekem hem foldaon kam moa olsem ren.

²⁸ An hemi putum wata ya insaet long olketa klaod fo kamdaon olsem ren fo evri pipol.

²⁹ No eniwan hemi save hao nao olketa klaod ya i muv. An no eniwan hemi save hao nao tanda hemi bosta long skae long ples wea God hemi stap long hem.

³⁰ God hemi mekem laetning fo laet olobaot long skae, bat mekem insaet long dipsi fo tudak nomoa.

³¹ Long ren nao, God hemi lukaftarem olketa pipol, an hemi givim plande gudfala kaikai long olketa.

³² Hemi holem laetning olsem spia insaet long han blong hem, an hemi sutim go long ples wea hemi laek fo kasem.

³³ Taem olketa pipol i herem tanda, olketa save nao dat komburu hemi kam. Komburu nao hemi saen wea God hemi kros tumas long olketa ravis wei.