Stori abaotem Job 35 - Pijin Bible

¹ Elihu hemi gohed moa fo tok olsem:

² Job, ating wei blong yu hemi no stret. Yu talem dat laef blong yu hemi stret nomoa long ae blong God.

³ Long semtaem tu yu talem dat sapos yu no sin hemi no helpem yu fo garem eni gudfala samting.

⁴ Distaem, mi givim ansa long yu an trifala fren blong yu.

⁵ Yu luk goap long skae an lukim olketa klaod ya, olketa stap hae tumas from graon. God hemi hae moa.

⁶ Nomata yu sin, hemi no save tasim God. An nomata yu duim staka nogud samting, hemi no save duim enisamting long hem.

⁷ Nomata yu duim olketa stretfala samting, bat hemi nating helpem hem nomoa. God hemi no nidim enisamting nomoa from han blong yu.

⁸ Olketa sin blong yu save spoelem nomoa olketa narafala pipol. An olketa gudfala samting wea yu duim, hemi save helpem nomoa olketa pipol ya.

⁹ Taem bikfala trabol hemi kasem pipol, olketa krae tumas. Ya, taem olketa bikman mekful long pipol, olketa singaot long eniwan fo helpem olketa.

¹⁰ Bat olketa nating kol go nomoa long God hu hemi mekem olketa. An long tudak olketa no singaot long God hu hemi givim olketa singsing long olketa.

¹¹ Nomata God hemi mekem pipol fo waes moa winim olketa animol an olketa bed, olketa pipol no tane go long hem fo hemi helpem olketa.

¹² Bikos olketa ravis pipol i praod tumas, God hemi no ansarem olketa nao.

¹³ Hemi yusles nomoa fo olketa krae go olsem, bikos God hu hemi garem evri paoa, hemi nating luksave long olketa, an hemi nating herem olketa.

¹⁴ Sapos hemi olsem, hao nao bae hemi save lisin kam long yu Job. Yu sei wea yu no lukim God, bat yu weit nomoa fo hemi ansarem kes blong yu.

¹⁵ ?Waswe, yu tingse taem God hemi kros, hemi no save panisim olketa ravis man, an hemi no tingim nomoa sin blong olketa?

¹⁶ Job, toktok blong yu hemi samting nating nomoa, an yu no save dat yu toktok tumas.