Stori abaotem Job 34 - Pijin Bible

Elihu hemi tok moa long trifala fren blong Job

¹ Elihu hemi tok olsem:

² Yutrifala waes man hu i save tumas, yutrifala mas lisin kam long toktok blong mi.

³ Olsem tang blong man hemi testem wea kaikai hemi suit o nomoa, ia blong man hemi traem toktok.

⁴ Yumi mas waka tugeta fo faendemaot wanem hemi stret, an wanem hemi gud.

Elihu hemi tokabaotem wanem Job hemi bin talem

⁵ Job hemi bin tok olsem, “Laef blong mi hemi stret nomoa, bat God hemi no letem mi fo garem raet blong mi.

⁶ Nomata laef blong mi hemi stret, hemi gohed fo lukim mi olsem mi wanfala man fo laea. An nomata mi no fit fo panis, God hemi sutim mi an mi redi nomoa fo dae.”

⁷ No eniwan hemi olsem Job. Hemi laek fo dringim olketa nogud wei olsem hemi wata.

⁸ Hemi fren olowe nomoa wetem olketa nogud pipol.

⁹ Hemi talem dat hemi yusles nomoa fo duim wanem God hemi hapi long hem.

¹⁰ Yutrifala hu i save tumas, yutrifala mas lisin kam long mi. God hu hemi garem evri paoa, hemi no save duim eni ravis samting.

¹¹ Hemi peim olketa pipol falom waka wea olketa duim. An hemi givim long olketa wanem hemi fitim olketa wei blong olketa.

¹² Hemi tru ya, God hemi no save duim eni rong samting. Ya, God hu hemi garem evri paoa, hemi no save spoelem stretfala wei.

¹³ No eniwan moa hemi givim paoa long God, mekem hemi yusim fo rul ovarem disfala wol.

¹⁴ Sapos hemi tekembaek Spirit blong hem ya wea hemi mekem yumi laef,

¹⁵ oraet, yumi evriwan long disfala wol bae i dae, an bae yumi tane gobaek moa long dast.

Elihu hemi tok long Job

¹⁶ Job, sapos yu garem save, yu mas lisin kam long mi.

¹⁷ ?Waswe, sapos God hemi les long stretfala wei, yu tingse hemi save rul ovarem disfala wol? ?Waswe, bae yu tokspoelem God hu hemi stret an hemi barava strong tumas?

¹⁸ God nao hemi talem wea olketa sif i yusles, an olketa lida i nogud.

¹⁹ Hemi no saet wetem olketa lida, an hemi no fevarem olketa risman winim olketa puaman, bikos hem nomoa hemi mekem olketa evriwan.

²⁰ Kuiktaem nomoa, olketa evriwan nomoa bae dae long naet. Ya, seknomoa, nomata man hemi strong tumas, hemi isi nomoa fo God hemi kilim hem dae.

²¹ God hemi gohed fo lukluk strong long wei blong pipol. An hemi lukim evriples olketa go long hem.

²² No eniples hemi barava tudak, wea hemi fitim fo olketa man nogud go haed long hem, mekem God hemi no save lukim olketa.

²³ God hemi no wari fo makem taem wea olketa pipol save go long hem fo hemi jajem laef blong olketa.

²⁴ Hemi save finis long olketa bikman, so hemi no wari fo savegud moa long olketa bifoa hemi spoelem olketa an sensim olketa.

²⁵ Hemi save finis long wei blong olketa bikman ya, so, hemi torowem olketa long naet, an hemi spoelem olketa nao.

^26-27 Olketa ya no falom toktok blong hem nao, an olketa no wari long olketa wei blong God. So, hemi panisim olketa, long frant long evriwan mekem evriwan lukim.

²⁸ Oltaem olketa mekful tumas long olketa pua pipol. Hem nao olketa pua pipol ya i krae go long God. Hemi herem olketa hu i stragol, an hemi helpem olketa.

²⁹ ?Waswe, sapos God hemi herem olketa, bat hemi no duim enisamting, hu nao hemi garem paoa fo talem dat hemi rong? ?Sapos God hemi haedem fes blong hem, hu nao save lukim hem? Bat hemi kontrolem olketa pipol an olketa kantri,

³⁰ so hemi no letem ravis man fo rul ovarem eni kantri, an mekful long olketa pipol.

³¹ Job, yu mas talemaot sin blong yu long God. An yu mas promis dat bae yu no sin moa.

³² Yu mas askem hem fo hemi somaot olketa rong blong yu wea yu no save lukim. An yu mas promis long hem wea bae yu no duim moa.

³³ Ating yu laekem God fo sensimbaek wei blong yu falom tingting blong yu, bikos yu les long wanem God hemi duim. Mi no save talemaot sin blong yu long God, yu seleva nao mas siusim wei fo falom. Oraet, yu talem kam tingting blong yu long mi.

³⁴ Olketa hu i waes an garem save bae agri long toktok blong mi, an tok olsem,

³⁵ “Wanem Job hemi talem hemi no garem eni gudfala save long hem, an toktok blong hem hemi here krangge nomoa.”

³⁶ Mifala laekem tumas fo God hemi barava panisim Job, bikos hemi tok olsem wanfala ravis man.

³⁷ Wei wea hemi agensim God, hemi mekem sin blong hem bikfala moa. Yu gohed fo klapem han blong hem agensim mifala, an hemi toktok tumas agensim God tu.