Stori abaotem Job 33 - Pijin Bible

¹ Job, yu mas lisin kam gudfala long evri toktok wea bae mi talem long yu.

² Distaem, mi redi fo openem maos blong mi, toktok blong mi hemi redi nao.

³ Olketa toktok wea mi talem hemi stret, an hemi tru.

⁴ Spirit blong God hu hemi garem evri paoa, hem nao hemi mekem mi, an hemi givim laef long mi.

⁵ Sapos yu laek fo ansarem mi, yu redim kam olketa toktok agensim mi.

⁶ Yumitufala i semsem nomoa long ae blong God. God hemi mekem mi tu long graon, barava olsem yu.

⁷ Yu mas no fraetem mi. Bae mi no spoelem yu.

⁸ Mi bin herem wanem yu talem ya.

⁹ Yu bin talem dat yu stret fogud an yu no sin. An yu bin talem dat yu klin long ae blong God an yu no fit fo panis.

¹⁰ Yu bin talem dat God hemi faendem enikaen rison fo panisim yu, an hemi mekem yu kamap enemi blong hem.

¹¹ Yu bin talem dat hemi taengem tufala lek blong yu, an hemi lukluk falom evrisamting wea yu duim.

¹² Bat mi talem long yu, yu rong nao ya. God hemi hae moa winim evriwan.

¹³ ?Waswe nao yu tokdaonem God, an talem dat hemi no ansarem komplen blong yu?

¹⁴ Nomata God hemi gohed fo toktok plande taem, no eniwan hemi lisin long hem.

¹⁵ Taem pipol i slip long naet, God hemi save tok kam long olketa kaen drim.

¹⁶ Hemi mekem olketa fo herem toktok blong hem, an hemi mekem olketa fo fraetem olketa woning blong hem.

¹⁷ Hemi duim olsem fo mekem pipol no sin, an fo no praod.

¹⁸ Bikos bae hemi no letem olketa godaon long grev. Ya, bae hemi no letem olketa dae long faet.

¹⁹ Hemi letem sik fo kasem man, an hemi mekem olketa bon blong man kamap soa tumas. Long wei olsem hemi stretem laef blong hem.

²⁰ Plande taem olsem, man hu hemi sik hemi les long kaikai, an nomata olketa nambawan kaikai hemi luk ravis nomoa long hem.

²¹ Hemi kamap barava bon nating, wea yu save kaontem nomoa evri bon blong hem.

²² Kolsap nomoa man olsem hemi dae, an godaon insaet long grev.

²³ Nomata 1,000 enjel i stap, wanfala spesolwan nao save helpem man, an talem hem wanem nao hemi stret.

²⁴ Disfala spesol enjel hemi save kaen long man, an tok olsem go long God, “Yu no letem man ya godaon insaet long grev. Mi garem samting fo peimaot hem.”

²⁵ Long taem olsem, bodi blong man ya save kamap gud, an bae hemi strong moa olsem yang man.

²⁶ Den disfala man hemi save prea go long God, an bae God hemi hapi long hem. An disfala man bae hemi hapi tumas taem hemi go frant long ae blong God, bikos God hemi mekem hem gudbaek moa.

²⁷ Bihaen, disfala man bae hemi save singsing olsem long olketa pipol, “Mi wanfala man fo sin, an mi no duim olketa stretfala samting, bat God hemi no panisim mi fitim sin ya.

²⁸ Mi kolsap dae an godaon long grev, bat hemi kipim mi from dae, hem nao mi laef yet fo lukim delaet.”

²⁹ Oltaem nomoa, God hemi gohed fo du-duim disfala samting.

³⁰ Oltaem, no letem pipol godaon insaet long grev, an hemi mekem laet blong hem fo saen go long olketa.

³¹ Job, yu lisin kam gudfala long mi. Yu stap kuaet, an letem mi toktok fastaem.

³² Sapos yu garem enisamting fo talem, yu talem kam mekem mi herem. Mi laekem toktok blong yu fo somaot dat yu stret nomoa.

³³ Bat sapos yu no garem enisamting fo talem, hemi gud fo yu stap kuaet nomoa, an lisin kam long mi. Bae mi tisim olketa waes tingting long yu.