Stori abaotem Job 32 - Pijin Bible

¹ Bikos Job hemi barava biliv wea hemi stret nomoa, trifala fren blong hem i givap nao an no ansarem hem moa.

Olketa toktok blong Elihu ( ) Elihu hemi tok long trifala fren blong Job

² Bat long datfala taem, wanfala man hemi stap wea nem blong hem nao Elihu. Hemi san blong Barakel long laen blong Bus, an Bus ya hemi long laen blong Ram. Elihu hemi kros tumas long Job, bikos Job hemi sei wea hemi wanfala stretfala man, an hemi gohed fo talem dat God nao hemi no stret.

³ Elihu hemi kros tu long trifala fren blong Job, bikos trifala no save givim ansa long toktok blong hem, bat olketa jajem hemi olsem hemi fit fo panis.

⁴ Bat bikos Elihu hemi yang winim trifala ya, hemi weit go-go evriwan i finisim toktok blong olketa.

⁵ Taem hemi lukim dat trifala ya i kuaet, hemi barava kros tumas.

⁶ So Elihu hemi tok olsem: Mi wanfala yang man nomoa, an yufala olo nao, dastawe mi fraet fo talemaot tingting blong mi long yufala.

⁷ Mi tingting olsem, hemi gud nao yufala olketa olo talemaot olketa waes toktok.

^8-9 I no olketa oloman nomoa hu i waes, an i no olo nomoa hu hemi save long wanem hemi stret. Spirit blong God hu hemi garem evri paoa nao, hemi mekem man fo kamap waes an garem save.

¹⁰ Hem nao mi laekem yufala fo lisin kam long mi taem mi talemaot go tingting blong mi.

¹¹ Mi bin lisin nomoa long olketa toktok blong yufala. An mi herem tingting blong yufala taem yufala traehad fo faendem wanem fo talem.

¹² Mi bin lisin gudfala long yufala, bat mi lukim dat tingting blong yufala hemi sot tumas. An no eniwan long yufala save somaot dat Job hemi rong.

¹³ Yufala mas lukaot, nogud yufala tingse yufala nao i waes. God nomoa mas givim ansa long Job, bikos yufala no fitim nao.

¹⁴ Job hemi no trae yet fo toktok long mi. Bat taem hemi duim, bae mi no ansarem hem long wei wea yufala bin givim ansa long hem ya.

Elihu hemi toktok long Job

¹⁵ Trifala ya i sot finis, dastawe trifala no save ansarem yu.

¹⁶ Trifala nating garem enisamting moa fo talem, so mi no save jes stap an weit nomoa.

¹⁷ Distaem, bae mi tok long yu nao. Ya, bae mi talemaot wanem mi tingim.

¹⁸ Mi no save weit, mi barava fulap long toktok, so mi mas tokaot nao.

¹⁹ Mi kolsap bosta long toktok nao, olsem niufala waen save mekem kontena long skin blong nanigot i suelap an bosta.

²⁰ Mi mas tok nao, mekem mi filgud moa.

²¹ Job, bae mi no saet wetem yu, an mi no save saet wetem trifala ya tu. An bae mi no trae fo suitim eniwan long yufala.

²² Mi no save toksuit long yufala, bikos sapos mi duim olsem, God hu hemi mekem mi, bae hemi panisim mi kuiktaem.