Stori abaotem Job 31 - Pijin Bible

Job hemi talem dat hemi stret nomoa

¹ Job hemi tok olsem: Mi mekem wanfala strongfala promis finis, fo no lukstrong long eni gele, an no tingting fo durong wetem hem.

² God hu hemi garem evri paoa, an hemi stap long heven, hemi panisim man sapos hemi duim datfala nogud samting ya.

³ Hemi sendem bikfala trabol fo kasem olketa ravis man. Ya, bae hemi gohed fo spoelem olketa hu i gohed fo durong.

⁴ God hemi save finis long evrisamting mi duim, an hemi save finis long evri ples mi go-go long hem.

⁵ Mi no falom wei blong konman, an mi nating save laea long eniwan.

⁶ Letem God hemi makem laef blong mi, mekem hemi lukim wea mi nating duim eni nogud samting.

⁷ Sapos mi lusim gudfala wei blong God, o sapos mi aftarem nomoa wanem mi bin lukim, o sapos han blong mi hemi mekem mi fo sin,

⁸ oraet, letem olketa narafala man i tekem kaikai long gaden blong mi, an kaikaim olketa kaikai ya.

⁹ Sapos mi aftarem waef blong wanfala man, nao mi krip go long hem,

¹⁰ oraet, letem waef blong mi kamap olsem wakamere blong narafala man an slip wetem hem nao.

¹¹ Sapos mi sin olsem hemi barava nogud tumas, an hemi fitim fo olketa jaj i panisim mi falom lo.

¹² Diskaen sin fo durong hemi olsem bikfala faea long hel, an hemi save bonem evrisamting wea mi garem.

¹³ Taem wanfala haosboe o haosgele blong mi, hemi komplen long mi mi gohed fo lisin nomoa long hem, an mi stretem samting ya.

¹⁴ ?Sapos mi no duim olsem, wanem nao bae mi duim taem God hemi kam jajem mi? ?An taem God hemi sekap long mi, bae wanem nao mi talem long hem?

¹⁵ Disfala sem God wea hemi mekem mi long bele blong mami blong mi, hemi tu hemi mekem olketa ya long bele blong mami blong olketa.

¹⁶ Oltaem nomoa mi helpem olketa puaman, an mi strongim tingting blong olketa wido.

¹⁷ Evritaem mi givim kaikai long olketa pikinini wea dadi blong olketa i dae finis.

¹⁸ Oltaem long laef blong mi, mi nao mi lukaftarem olketa hu i no garem dadi, an mi sapotem olketa wido.

¹⁹ Taem mi lukim wea olketa pua pipol i no garem kaleko, an olketa dae long tukol,

²⁰ mi givim kaleko long olketa ya. Kaleko ya olketa wakem long wul from olketa sipsip blong mi. So taem olketa pua pipol i save hotem bodi blong olketa long kaleko ya, olketa tokhae long mi.

²¹ Sapos mi mekem saen long han blong mi agensim olketa hu i no garem dadi, bikos mi save dat jaj hemi saet wetem mi long kot,

²² oraet, letem God hemi brekemaot han blong mi from ples blong hem long solda.

²³ Mi nating laek fo duim eni ravis samting long pua pipol, bikos mi fraetem paoa blong God, an mi wari olsem maet hemi spoelem mi.

²⁴ Mi no trastem nomoa olketa risis blong mi. An mi no dipen long olketa samting wea mi garem.

²⁵ Mi nating filpraod nomoa long plande samting wea mi garem bikos mi bin wakahad.

²⁶ Nomata san hemi saen bikfala, an mun hemi luknaes tumas, bat mi nating wosipim nomoa eniwan long tufala.

²⁷ Mi nating staphaed fo mekhae long tufala ya. An mi no mekem kis long han blong mi fo wosipim tufala ya.

²⁸ Sapos mi bin mekem diskaen sin olsem, mi agensim nao God hu hemi hae tumas, an hemi fitim fo mi mas dae.

²⁹ Mi nating hapi taem olketa enemi blong mi i safa, an mi nating hapi nomoa taem trabol hemi kasem olketa.

³⁰ Mi no sin long toktok blong mi bikos mi nating kolem kam trabol long olketa ya.

³¹ Evri wakaman blong mi i save finis wea oltaem evriwan save kaikai gud long haostent blong mi.

³² Mi askem olketa strensa hu i kasem ples blong mi fo stap fastaem long haostent blong mi. An eniwan long wanfala gogo, hemi save stap kam insaet long haostent blong mi.

³³ Plande narafala pipol i trae fo haedem sin blong olketa, bat mi nating save haedem sin blong mi.

³⁴ Mi no fraetem wanem pipol maet talem abaotem mi. Nomata olketa maet tokspoelem mi, bat mi nating save stap kuaet insaet long haostent blong mi.

³⁵ Maewat, mi laekem tumas fo samwan lisin kam long kes blong mi. Mi putum mak blong mi long evrisamting mi talem. So, letem God hu hemi garem evri paoa, hemi ansarem mi. Hem nao hemi mas raetem kam wanem hemi jajem long mi.

³⁶ Yufala save, bae mi hapi tumas fo karim wanem hemi raetem antap long solda blong mi. An bae mi putum antap long hed blong mi olsem wanfala kraon.

³⁷ Long taem ya, bae mi stanap olsem wanfala sif frant long God, an talemaot long hem evrisamting wea mi bin duim.

³⁸ Sapos mi no barava lukaftarem graon blong mi, an mi spoelem hem,

³⁹ an sapos mi kaikaim evrisamting wea i grou long gaden blong mi, mekem olketa gaden man hu i plantem graon ya fo hanggre nomoa,

⁴⁰ oraet, letem olketa nilagras an olketa ravis tri nomoa i grou long gaden ya. Olketa toktok blong Job hemi finis nao.