Stori abaotem Job 30 - Pijin Bible

Job hemi komplen moa

¹ Bat distaem mi olo nao, an olketa yangfala i mekfan nomoa long mi. Olketa dadi blong olketa i yusles fogud. Olketa ya i nating fit fo helpem olketa dog blong mi fo gadem olketa sipsip.

² Olketa man olsem i nating save helpem mi, bikos olketa i olo finis an i barava wik tu.

³ Olketa ya i barava pua an hanggre fogud. So oltaem, olketa save goaot long naet an kaikaim nomoa eni drae rut wea olketa save faendem long drae eria.

⁴ Olketa ya i tekem enikaen ravis lif nomoa fo kaikaim. Nomata rut blong olketa ravis tri, bat olketa kaikaim tu.

⁵ Pipol i raosim olketa ya, an ronem olketa ya aot from ples, olsem olketa man fo stil.

⁶ Olketa ya nating garem haos fo stap long hem, so olketa stap olobaot nomoa insaet long olketa kev long saet long olketa hil.

⁷ Olketa ya singaot bikfala olobaot nomoa long bus, olsem olketa wael animol, an olketa ya i hipap tugeta andanit long olketa tri.

⁸ Olketa olo ya i krangge an nating garem gudfala nem. Dastawe, pipol i bin wipim olketa ya fo raosim olketa from disfala lan.

⁹ Distaem, olketa pikinini blong olketa ya, i mekfan nomoa long mi long olketa ravis singsing. Ya, olketa yusim nem blong mi olsem wanfala toksuea nao.

¹⁰ Olketa ya i les long mi, so olketa kam spit nomoa long ae blong mi.

¹¹ God hemi mekem mi wik fogud an hemi mekem mi safa, so olketa ya i duim enisamting nomoa agensim mi.

¹² Olketa ya hipap fo faetem mi, an mekem mi ranawe. Olketa ya mekredi finis fo kam an spoelem mi finis.

¹³ Olketa ya spoelem rod blong mi, an mi no save ranawe nao. Taem olketa spoelem mi, olketa no nidim eniwan fo helpem olketa.

¹⁴ Olketa ya kam agensim mi olsem ami wea hemi gotru long wolston wea hemi brek. Ya, olketa kam kavaremap mi olsem olketa wev long si hemi brek kam antap long mi.

¹⁵ Bikfala trabol nao hemi mekem mi fraet tumas. Hae nem blong mi hemi lus kuiktaem nomoa olsem smok wea win hemi bloum go. An gudfala laef blong mi i lus nomoa from mi olsem wanfala klaod wea win hemi bloum go.

¹⁶ Distaem, laef blong mi hemi kolsap lus nao. An mi safa evri de nomoa.

¹⁷ Long naet, hemi olsem pein hemi kaikaim olketa bon blong mi. Disfala pein insaet long bodi blong mi, hemi nating save stop nao.

¹⁸ Pein ya hemi barava spoelem skin blong mi. Mi fil olsem disfala pein hemi skuisim nek blong mi.

¹⁹ Disfala pein hemi torowem mi godaon nao insaet long mad. An mi samting nating olsem asis nao.

Job hemi prea go long God

²⁰ God, mi krae go long yu, bat yu nating ansarem mi nomoa. Mi stanap fo prea go long yu, bat yu lukluk nomoa long mi.

²¹ Yu kam fo mekful long mi. An long paoa long han blong yu, yu kilim mi.

²² Yu letem win fo hemi karim mi go nao. An yu torowem mi go olobaot nao olsem mi insaet long wanfala saekloun.

²³ Mi save dat bae yu aotem laef blong mi, an bae mi godaon insaet long grev olsem evri nara man.

²⁴ Taem man wea laef blong hem hemi bagarap, hemi krae kam long mi, mi no spoelem hem.

²⁵ Mi bin gohed fo krae wetem olketa pipol wea trabol hemi kasem olketa, an mi sore tumas long olketa pua pipol.

²⁶ Bat wea, taem mi laek fo lukim olketa gudfala samting, enikaen trabol nomoa hemi kam spoelem mi. An taem mi traehad fo lukim laet, maen blong mi jes kamap tudak nao.

²⁷ Haat blong mi hemi fulap long wari, an tingting blong mi hemi no save stap kuaet.

²⁸ Oltaem tingting blong mi hemi hevi, olsem wea mi stap nomoa insaet long tudak. Mi stanap kolsap long pipol hu i hipap tugeta, an singaot long olketa fo helpem mi.

²⁹ Ating voes blong mi hemi krae nogud olsem voes blong wael dog. Ating mi stap seleva nomoa olsem bikfala bed blong drae eria.

³⁰ Bodi blong mi hemi barava hot tumas long fiva. An skin blong mi hemi nogud an hemi stat fo kamaot.

³¹ Distaem, mi herem olketa gita i mekem miusik fo sore nomoa, an taem olketa bloum bambu hemi here olsem krae nomoa.