Stori abaotem Job 27 - Pijin Bible

Job hemi talem dat hemi wanfala stretfala man

¹ Job hemi tok moa olsem,

² Hemi barava tru tumas wea God hemi no letem mi fo garem raet blong mi. Ya, God hu hemi garem evri paoa hemi mekem laef blong mi fo kamap barava nogud tumas.

³ Taem lelebet laef blong God hemi stap insaet long mi yet,

⁴ mi no save talem eni ravis toktok, an mi no save laea.

⁵ Oltaem bae mi no save talem dat wea toktok blong yutrifala hemi stret. An go-go kasem taem mi dae, mi no save talem dat mi no stret.

⁶ Tingting blong mi hemi klia nomoa. Dastawe nao mi no save givap fo talemaot wea wei blong mi hemi stret nomoa.

⁷ Letem God hemi panisim evri enemi blong mi, olsem hemi panisim man nogud.

⁸ Taem God hemi mekem ravis man dae, evrisamting wea hemi tingting strong long hem hemi lus finis.

⁹ Taem trabol hemi kasem ravis man, God hemi no herem krae blong hem.

¹⁰ Hemi olsem bikos, ravis man hemi no hapi long God hu hemi garem evri paoa, an hemi no prea go long hem olowe.

¹¹ Bae mi tisim yutrifala abaotem paoa blong God. An bae mi talemaot mining blong olketa plan blong hem.

¹² Yutrifala nao lukim finis olketa samting ya, Bat yufala gohed fo talem olketa toktok wea i samting nating nomoa.

¹³ Bae mi talemaot wei wea God hu hemi garem evri paoa hemi panisim ravis man hu hemi save mekful long pipol.

¹⁴ Nomata hemi garem plande pikinini, bat bae olketa no garem naf kaikai, an bae olketa dae long faet.

¹⁵ An samfala bae dae long ravis sik. Nomata olketa waef blong olketa ya, bae i no save krae fo olketa.

^16-17 An nomata hemi garem staka seleni, olketa stretfala pipol bae searem olketa seleni ya. Ya, nomata hemi hipimap staka kaleko, bat olketa gud pipol nao bae werem.

¹⁸ Haos wea man nogud hemi mekem bae hemi no save stap longtaem olsem nest blong spaeda. Ya, hemi nating strong olsem haos long gaden wea olketa wakem nomoa long olketa lif banana.

¹⁹ Wanfala de, maet man nogud hemi ris taem hemi go slip, bat taem hemi wekap long moning, evrisamting blong hem i lus nao.

²⁰ Olketa trabol bae kasem hem olsem bikfala flad. Ya, olketa trabol bae kam long hem olsem wanfala saekloun long naet.

²¹ Hemi olsem barava bikfala win hemi blou kam, an hemi karim hem aot from ples blong hem.

²² Hemi traehad fo ranawe, bat hemi had tumas bikos win ya hemi barava strong tumas an spoelem disfala man.

²³ Win ya hemi meknoes olsem hemi tokspoelem disfala man. An hemi olsem win hemi wisol fo mekfan long hem.