Stori abaotem Job 26 - Pijin Bible

Job hemi toktok moa

¹ Job hemi ansa olsem:

² !Sei, mi nating garem eni paoa, an mi no strong, bat yu nating helpem mi nomoa!

³ Maewat, mi no garem waes an save, bat yu bin givim kam olketa gudfala advaes blong yu.

⁴ !Oloketa! ?Hu nao hemi bin helpem yu fo talemaot toktok blong yu? ?Wanem nao hemi mekem yu fo tok olsem?

⁵ Olketa spirit blong olketa man dae i seksek fogud. Olketa ya wea i stap insaet long wata andanit long wol i fraet tumas.

⁶ God hemi lukim nomoa evriwan long ples blong olketa man dae. No eniwan save haed long Abadon.

⁷ Hemi putum skae blong not long wanfala emti ples, an hemi mekem disfala wol stap long ples wea no enisamting i holem hem.

⁸ Hemi satem wata insaet long olketa bikfala klaod. Bat nomata wata ya hemi hevi tumas, hemi nating brekem olketa klaod ya.

⁹ Hemi mekem olketa klaod fo satem ples wea hemi sidaon long hem.

¹⁰ Hemi putum mak antap long si wea hemi mitim skae, fo hemi divaedem delaet an tudak.

¹¹ Taem hemi tokstrong long olketa pos wea i holemap skae, olketa fraet, an seksek fogud olsem wanfala man.

¹² God hemi yusim paoa blong hem fo mekem solwata hemi stap kuaet. An long save blong hem, hemi kilim dae jaean krokodael Rehab.

¹³ Hemi bloumaot olketa klaod fo mekem skae hemi klia. An hemi spiarem go bikfala si snek wea hemi mu-muv tumas, mekem snek ya hemi dae long han blong hem.

¹⁴ Bat, olketa samting ya i olsem God hemi toksmol nomoa. Ya, olketa i barava smolfala haf nomoa long olketa samting wea hemi save duim. So sapos God hemi barava somaot evri paoa blong hem, bae hemi olsem hemi mekem bikfala tanda, an bae yumi nating save long datfala paoa.