Stori abaotem Job 23 - Pijin Bible

Job hemi ansarem Elifas

¹ Job hemi ansa olsem:

² Distaem mi gohed yet fo barava komplen. Mi filnogud tumas, an mi no save stopem krae blong mi.

³ Mi laekem tumas fo save long ples wea God hemi stap long hem. An mi laekem tumas fo save long rod fo go kasem kot blong hem.

⁴ Taem mi faendem hem, bae mi talemaot kes blong mi long hem, an bae mi talem go evri poen blong mi.

⁵ Mi wande save wanem nao bae hemi talem long mi, an hao nao bae hemi ansarem mi.

⁶ ?Waswe, bae hemi agensim mi wetem paoa blong hem? Nomoa nao. Bae hemi lisin long olketa samting wea mi talem.

⁷ Long datfala taem, bae mi toktok gudfala wetem hem an hemi save lisin nomoa long stretfala man olsem mi. Sapos mi duim olsem, Jaj blong mi bae talemaot dat mi no fit fo panis.

⁸ Sapos mi go fo lukaotem hem long ist, bat hemi nomoa long ples ya. An sapos mi go fo lukaotem hem long west, bat mi no faendem hem long dea tu.

⁹ Taem God hemi waka long not an long saot, mi nating save faendem hem yet.

¹⁰ Nomata olsem, God hemi save long ples wea hemi save faendem mi. An taem hemi testem wei blong mi, bae hemi lukim dat laef blong mi hemi barava stret nomoa.

¹¹ Oltaem, mi tinghevi long hem, an mi falom evri wei blong hem. Mi nating lusim hem fo falom eni deferen wei.

¹² Oltaem, mi falom olketa strongfala toktok blong God. Ya, mi barava kipim olketa toktok blong hem long maen blong mi.

¹³ Hemi no save sens, an no eniwan save sensim tingting blong hem. An no eniwan save stopem hem from wanem hemi laek fo duim.

¹⁴ Bae hemi duim wanem hemi bin planem fo duim long mi. An plande plan moa i stap finis insaet long maen blong hem.

¹⁵ Dastawe mi save fraet tumas, taem mi tingim hem mi barava fraet fogud.

¹⁶ God hemi mekem tingting blong mi i wikdaon. Ya, God hu hemi garem evri paoa hemi mekem mi fraet tumas.

¹⁷ Nomata tudak nao i raonem mi an kavarem fes blong mi, bat mi no save kuaet.