Stori abaotem Job 22 - Pijin Bible

OLKETA MEKTRI TOKTOK ( ) Mektri toktok blong Elifas

¹ Elifas from Teman hemi tok olsem:

² ?Hao nao man save helpem God? Nomata man hemi waes tumas hemi nating save helpem God ya.

³ ?Waswe, sapos laef blong yu hemi stret, yu tingse hemi save helpem God hu hemi garem evri paoa? Gudfala laef blong yu hemi no save duim eni gudfala samting fo God.

⁴ God hemi no kotem yu an panisim yu bikos yu tinghae long hem.

⁵ Hemi panisim yu bikos yu sin tumas, an evrisamting wea yu duim hemi barava nogud.

⁶ Yu tekem kaleko blong wantok blong yu, fo mekem olketa sensimbaek kaon long yu. So olketa no garem nao enisamting fo werem.

⁷ Yu nating givim wata long olketa hu i barava dae fo wata, an yu bin stopem kaikai long olketa hu i hanggre.

⁸ Yu bin yusim paoa blong yu an biknem blong yu fo tekova long olketa lan, an yu givim go long olketa fren blong yu.

⁹ Yu les fo helpem olketa wido, an yu spoelem tu olketa pikinini wea dadi blong olketa i dae finis.

¹⁰ Dastawe, olketa trap stap raonem yu, an olketa trabol i kam wea yu fraet tumas.

¹¹ Ya, dastawe tudak hemi kam long yu an yu nating save lukluk. An hemi olsem wata hemi ran bikfala, an hemi draonem yu nao.

¹² God hemi stap kam long ples wea hemi hae tumas. Nomata olketa sta i hae, bat God hemi luk daon kam long olketa nomoa.

¹³ Bat yu gohed fo tok nomoa olsem, “God hemi no save long enisamting ya. Olketa klaod wea i tudak i satem hem, so hemi no save jajem yumi.”

¹⁴ Yu tingse, taem hemi wakabaot long skae, hemi no save lukim yumi, bikos bikfala klaod hemi satem hem.

¹⁵ ?Waswe, bae yu falom nomoa olfala wei wea olketa nogud pipol i falom bifoa ya?

¹⁶ Olketa ya i dae bifoa taem blong olketa hemi kam, olsem haos wea bikfala flad hemi tekem go.

¹⁷ Olketa pipol ya i les long God, an olketa nating bilivim wea God save duim enisamting long olketa.

¹⁸ Nomata olsem, God nao hemi bin givim evri gudfala samting long olketa nogud pipol. Bat mi les long tingting blong olketa ya.

¹⁹ Taem God hemi panisim olketa nogud pipol, olketa stretfala pipol i hapi an mekfan long olketa olsem,

²⁰ “Olketa enemi blong mifala i lus, an faea hemi bonem evrisamting blong olketa.”

²¹ Job, yu mas agri wetem God an stapgud wetem hem, den bae olketa gudfala samting save kasem yu.

²² Yu mas falom olketa samting wea hemi tisim, an yu mas tingim toktok blong hem olowe.

²³ Taem yu tane gobaek long God hu hemi garem evri paoa, an yu aotem ravis wei from laef blong yu, bae yu kamap gud moa.

²⁴ Yu mas torowem gol blong yu, ya, barava lusim nambawan gol blong yu.

²⁵ Den God hu hemi garem evri paoa, hemi save kamap olsem nambawan gol an silva blong yu.

²⁶ Sapos yu duim olsem, oltaem bae yu save hapi tumas long God, an bae yu save lukgo long hem.

²⁷ An taem yu prea long hem, bae hemi herem yu. An bae yu save duim evrisamting wea yu promis long hem fo duim.

²⁸ Evrisamting wea yu plan fo duim, bae hemi kamap gudfala. Ya, hemi olsem wea laet bae saen long wei blong yu.

²⁹ Yu save, taem pipol i foldaon long laef blong olketa, sapos yu askem, oraet, God hemi save sevem olketa ya.

³⁰ An barava stretfala wei blong yu, bae hemi sevem man hu hemi fit fo panis.