Stori abaotem Job 21 - Pijin Bible

Job hemi ansa long Sofa

¹ Job hemi ansa olsem:

² Yutrifala mas lisin gudfala long olketa toktok blong mi. Hem nomoa save mekem mi filgud lelebet.

³ Yutrifala mas weit an letem mi toktok fastaem. Taem mi finis, oraet, yutrifala save mekfan long mi moa.

⁴ ?Waswe, yutrifala tingse mi komplen agensim olketa pipol? Nomoa nao, mi komplen go long God. Dastawe mi les fo weit.

⁵ Yutrifala tingting kam long evrisamting wea i kasem mi, an seke long hem, den satem maos blong yutrifala.

⁶ Mi tu mi fraet an mi seke long olketa samting wea i bin hapen long mi.

⁷ ?Waswe nao God hemi letem olketa nogud pipol fo laef longtaem an kamap olfala, an kamap strong an ris tumas?

⁸ Olketa gohed laef fo lukim taem olketa pikinini an olketa smol grani blong olketa i grouap kam.

⁹ Olketa stap gud an nating fraetem eni nogud samting. An God hemi no panisim olketa.

¹⁰ Oltaem olketa man buluka mekem mere buluka blong hem fo babule. An olketa buluka ya i gohed fo bonem pikinini isi nomoa.

¹¹ Oltaem, olketa pikinini blong olketa nogud pipol i stap gudfala an ran olobaot bikos olketa hapi.

¹² Olketa gohed fo hitim tamborin, an ringim gita an bloum olketa bambu, an olketa gohed fo dans tu.

¹³ Olketa pipol olsem i garem nomoa hapi laef, an olketa nating safa taem olketa dae.

¹⁴ Olketa nogud pipol ya i talem God fo lusim olketa. Olketa nating wande fo save long olketa wei blong hem.

¹⁵ Olketa tingse, olketa no nid fo duim enisamting nomoa fo God. An olketa tingse prea hemi samting nating nomoa.

¹⁶ Olketa tingse olketa gudfala samting wea olketa garem, hemi from hadwaka blong olketa seleva nomoa. Bat mi save olsem, disfala tingting blong olketa hemi nating tru.

¹⁷ Olketa nogud pipol ya i no dae taem olketa i yangfala. An bikfala trabol wea i kamap from kros blong God, i no save kasem olketa ya.

¹⁸ God hemi no torowem olketa nomoa, olsem drae gras wea win hemi bloum go an hemi lus.

¹⁹ Samfala man talem dat God hemi panisim olketa pikinini from olketa sin blong dadi blong olketa. Bat mi tingse disfala wei ya hemi nogud. Hemi moabeta fo God hemi panisim man fo olketa sin blong hem seleva.

²⁰ Nogud man mas garem panis blong hem seleva, mekem hem filim kros blong God hu hemi garem evri paoa.

²¹ Taem hemi dae finis, hemi no save tingim moa wanem bae hemi hapen long pikinini blong hem.

²² God hemi jajem olketa long heven, so no eniwan save tisim hem moa.

^23-24 Samfala pipol i hapi an stap gudfala, an bodi blong olketa i helti go-go kasem taem olketa dae.

²⁵ An samfala pipol moa i sore an filnogud tumas an nating stap gudfala nomoa go-go kasem taem olketa dae.

²⁶ Bat bae olketa evriwan mas dae, an bodi blong evriwan mas go long graon. Olketa wom nao bae i fulap long bodi blong olketa evriwan.

²⁷ Mi save finis wea yutrifala garem olketa ravis tingting fo spoelem mi nomoa.

²⁸ Yutrifala gohed fo ask olsem, “?Wea nao ples blong bikman? Wea nao haostent blong ravis man?”

²⁹ ?Waswe, yutrifala no stori yet wetem olketa pipol hu i gogo long olketa narafala ples? ?Waswe, yutrifala no herem stori wea olketa talem?

³⁰ Stori nao hemi olsem: Long taem God hemi kros an panis pipol, trabol hemi no kasem olketa nogud pipol.

³¹ No eniwan save tokagensim ravis wei blong man nogud, an no eniwan panisim hem fo evri nogud samting hemi duim.

³² Taem man olsem hemi dae, olketa karim hem go long grev. An olketa lukaftarem grev blong hem.

³³ Plande pipol tumas nao i hipap tugeta taem olketa berem hem, an bodi blong hem hemi hapi fo go long graon.

³⁴ So yutrifala no save strongim tingting blong mi wetem olketa tok nating blong yutrifala. Evri toktok wea yutrifala talem i laea nomoa.