Stori abaotem Job 19 - Pijin Bible

Job hemi ansarem moa Bildad

¹ Job hemi ansa olsem:

² ?Hao long nao bae yutrifala gohed fo toktok fo mekem mi safa?

³ Staka taem nomoa yutrifala tokspoelem mi. ?Waswe, yutrifala nating sem nomoa long wei wea yutrifala agensim mi?

⁴ Nomata mi duim enisamting rong, bat hemi blong mi seleva ya, i no blong yutrifala.

⁵ Yutrifala tingse yutrifala nao i moabeta winim mi. An yutrifala talem dat sem long trabol blong mi hemi somaot dat mi rong.

⁶ Bat wea, yutrifala mas save dat God nao hemi mekem mi fo safa. An hemi holem mi long trap blong hem.

Job hemi komplen agensim God

⁷ Nomata mi singaot mekem samwan hemi sevem mi, bat no eniwan hemi ansarem mi nomoa. An taem mi singaot fo samwan hemi helpem mi, bat no eniwan hemi duim eni stretfala samting fo mi.

⁸ God hemi blokem wei blong mi finis, an mi no save gotru. Hemi mekem wei blong mi i stap long tudak.

⁹ Hemi tekemaot biknem blong mi, an hemi spoelem finis gudnem blong mi.

¹⁰ Hemi kilim mi nogud, an mi lus nao. Hemi aotem hop blong mi olsem saekloun hemi aotem tri long graon.

¹¹ God hemi gohed fo faerem mi, bikos hemi kros tumas long mi. An hemi tingse mi nao wanfala enemi blong hem.

¹² God hemi sendem ami blong hem fo kam faetem mi. Olketa hipap raonem haostent blong mi, an olketa redi fo spoelem mi.

Job hemi stap seleva

¹³ God hemi mekem olketa brata blong mi fo lusim mi nao. Olketa fren blong mi i les fo lukim mi moa.

¹⁴ Olketa wantok blong mi an olketa fren blong mi i lusim mi finis.

¹⁵ Olketa hu i ka-kam long haos blong mi bifoa, distaem olketa no save long mi nao. An olketa haosgele blong mi i tingim mi wanfala strensa nomoa.

¹⁶ Nomata mi kolem kam wanfala wakaman blong mi, bat hemi nating kam nomoa. An nomata mi gohed fo askem hem fo helpem mi, bat hemi nating duim nomoa.

¹⁷ Waef blong mi hemi les long smel blong maos blong mi. Olketa brata blong mi tu, i barava les tumas long mi.

¹⁸ Olketa pikinini tu i mekfan long mi. Taem mi kam kolsap long olketa, olketa tokspoelem mi.

¹⁹ Olketa fren blong mi i barava les long mi nao. An olketa wea mi lavem tumas, i agensim mi.

²⁰ Mi barava bon nating, an kolsap nomoa mi dae, bat mi laef yet.

²¹ Yutrifala fren blong mi, nomata God hemi kilim mi, plis yutrifala sore kam long mi.

²² ?Waswe nao yutrifala aftarem mi olsem wea God hemi duim? Ating yutrifala laek fo kaikaim bodi blong mi.

Job hemi trastem God

²³ Mi laekem samwan fo tingim toktok blong mi, an hemi raetemdaon long wanfala buk.

²⁴ Ya, mi laekem samwan fo tekem wanfala sisel, an katem go toktok blong mi antap long wanfala ston, mekem hemi no save lus enitaem.

²⁵ Mi save dat God hu hemi saet wetem mi hemi laef, an go-go bae hemi kam long wol fo mekem mi fri.

²⁶ Nomata disfala sik hemi spoelem finis bodi blong mi, bae mi save lukim God nomoa taem mi laef.

²⁷ Mi nao bae mi lukim hem long ae blong mi, an bae hemi no olsem wanfala strensa. Mi wik nao bikos mi barava laekem tumas.

²⁸ Yutrifala talem dat bae yutrifala aftarem mi, bikos yutrifala talem dat mi nao mekem trabol long mi seleva ya.

²⁹ Bat lukaot, yutrifala mas fraetem panis. Taem God hemi kros bae hemi panisim ravis pipol, an bae yutrifala jes save dat God hemi jajem yutrifala.