Stori abaotem Job 18 - Pijin Bible

Mektu toktok blong Bildad

¹ Bildad from Sua hemi tok olsem:

² ?Wataem nao bae yu finisim toktok ya? Sapos yu lelebet waes, bae mifala save toktok gud wetem yu ya.

³ ?Waswe, yu tingse mifala no garem save olsem olketa buluka ya?

⁴ Disfala kros blong yu, hemi spoelem yu seleva nomoa ya. ?Waswe, yu tingse evriwan mas lusim disfala wol fo mekem yu hapi? ?Waswe, yu tingse God hemi mas tekemaot olketa maonten, fo mekem tingting blong yu gud?

⁵ Yu save, laet blong man nogud bae hemi dae, an faea blong hem bae dae tu.

⁶ Ya, bae hemi olsem haostent wea i nating garem eni laet insaet. An nomata smolfala laet kolsap long hem, bae hemi dae finis.

⁷ Fastaem hemi wakabaot strong, bat bihaen, hemi wik. Olketa advaes blong hem seleva nomoa hemi mekem hem fo foldaon.

⁸ Lek blong hem hemi pas long wanfala net wea hemi staphaed.

⁹ Olketa bin putum wanfala trap fo kasholem hem, an hemi pas long trap ya.

¹⁰ Olketa bin haedem wanfala rop long graon, fo hemi pas long lek blong hem. Rop ya hemi holemtaet nao.

¹¹ Evrisamting fo mekem hem fraet hemi stap raonem hem finis. Olketa samting ya i falom hem long evri ples wea hemi go long hem.

¹² Bifoa, hemi wanfala risman, bat distaem hemi hanggre nao. Bikfala trabol hemi redi finis fo spoelem hem taem hemi foldaon.

¹³ Wanfala ravis sik hemi kavaremap bodi blong hem finis. Ya, disfala sik blong dae hemi mekem tufala han an lek blong hem fo roten nao.

¹⁴ Disfala sik hemi tekem hem aot from haostent blong hem. An hemi fosim hem fo go long sif blong olketa man hu i dae.

¹⁵ Faea hemi bonem haostent blong hem. An olketa hot ston salfa i bonem ples blong hem.

¹⁶ Disfala man nogud hemi kamap olsem wanfala tri, wea evri rut blong hem an evri brans blong hem i drae finis.

¹⁷ No eniwan save tingim hem moa, an no eniwan long disfala lan bae talem moa nem blong hem.

¹⁸ God bae hemi aotem hem from disfala wol wea hemi laet, an mekem hem go long ples wea hemi tudak.

¹⁹ Bae hemi no garem eni pikinini, an no eniwan bae bon kam long laen blong hem.

²⁰ Evriwan long ist an long west hu i herem kam nius abaotem dae blong hem, olketa fraet fogud an seke tumas long hem.

²¹ Hem nao trabol wea bae hemi kasem man nogud. Ya, hem nao fiusa blong man hu hemi les long God.