Stori abaotem Job 17 - Pijin Bible

¹ Laef blong mi hemi nogud nao, an dae blong mi hemi kam kolsap nao. Grev blong mi hemi redi finis.

² Mi lukim nomoa olketa pipol raonem mi hu i kros long mi an tokspoelem mi.

³ God, plis yu mekem promis fo helpem mi. Mi no garem eniwan nao fo peimaot mi fo mekem mi fri.

⁴ Yu satem finis tingting blong olketa, mekem olketa no save. Dastawe olketa no save winim mi.

⁵ Sapos man hemi tekem seleni fo tokspoelem fren blong hem, olketa pikinini blong man ya bae safa.

⁶ Distaem evriwan i laf long nem blong mi, an olketa gohed fo spit long ae blong mi.

⁷ Mi gohed fo sore an krae tumas go-go mi no save lukluk. An mi kamap bon nating nao.

⁸ Olketa stretfala pipol i sek fogud long mi. An olketa kros tumas long pipol hu i no falom God.

⁹ Samfala man i sei, “Eniwan hu hemi falom God, bae hemi no save foldaon. An laef blong man hu hemi no duim eni rong samting, bae hemi gohed fo kamap strong moa.”

¹⁰ Bat nomata yufala evriwan talem kam toktok ya, mi nating save faendem wanfala long yufala hu hemi waes.

¹¹ Laef blong mi hemi finis nao. Olketa plan blong mi hemi foldaon finis. An haat blong mi hemi filnogud.

¹² Olketa fren blong mi i talem dat mi stap long delaet, taem hemi tudak nomoa. Olketa talem dat delaet hemi kolsap kam nao, bat mi lukim daknes nomoa.

¹³ Distaem, wanfala samting wea mi weitem nao, fo dae an olketa berem mi insaet long grev. An long ples ya nao, bae mi leidaon insaet long tudak.

¹⁴ Ating grev hemi olsem dadi blong mi. An olketa wom nao i olsem mami an sista blong mi.

¹⁵ ?Sapos mi tingting olsem, wanem moa save mekem mi garem sans fo somaot dat mi stret?

¹⁶ ?Waswe, sapos mi dae an godaon long grev, bae disfala sans fo kamap stret hemi save godaon wetem mi long ples blong olketa man dae?