Stori abaotem Job 16 - Pijin Bible

Job hemi ansarem moa Elifas

¹ Job hemi ansa olsem:

² Mi herem finis olketa toktok olsem bifoa. Olketa toktok ya wea yutrifala talem fo helpem mi, hemi mekem trabol kasem mi.

³ ?Wataem nao olketa yusles toktok blong yutrifala bae finis? ?Wanem nao hemi mekem yu fo tok kam long mi olsem?

⁴ Sapos yu nao yu filnogud olsem mi, mi save talem go nomoa long yu evrisamting ya yu bin talem kam long mi. An sapos hemi olsem, mi tu mi save talem nomoa olketa semkaen toktok long yu, an sekem hed blong mi bikos mi sore long yu.

⁵ Sapos hemi olsem, ating bae mi strongim tingting blong yu, an toktok blong mi bae mekem yu filgud moa.

Job hemi prea go long God

⁶ Job hemi prea olsem long God: Nomata mi tok, hemi nating save stopem pein blong mi, an nomata mi stap kuaet, hemi no save aotem disfala pein.

⁷ God, yu barava mekem mi wik nao, yu nao bin spoelem evriwan long famili blong mi.

⁸ An yu mekem bodi blong mi olsem samting nating, so taem pipol i lukim dat mi bon nating, olketa tingse mi nogud.

Job hemi tok moa long trifala fren blong hem

⁹ God hemi faetem mi an hemi luk kros tumas long mi. Hemi spoelem bodi blong mi olsem wael animol hemi pisisim bodi blong narafala animol fo kaikaim.

¹⁰ Olketa pipol i tokspoelem mi, an olketa hipap kam raonem mi an slapem fes blong mi.

¹¹ God hemi givim mi finis long olketa nogud pipol, an hemi torowem mi go long han blong olketa ravis man.

¹² Fastaem mi bin stap gudfala nomoa, bat God hemi holem mi long nek, an hemi krasim mi nao. Ya, hemi yusim mi olsem mak blong hem fo sutim long olketa aro blong hem.

¹³ Hemi sutim mi kam long evri saet. Hemi nating sore long mi, an olketa aro blong hem i mekem mi garekil nogud tumas long bele blong mi, go-go insaet long bele blong mi i ran goaot long graon.

¹⁴ Hemi gohed fo faet agensim mi staka taem. Ya, hemi gohed fo faetem mi olsem soldia wea hemi brekem wolston blong taon.

¹⁵ Mi sore tumas so mi werem olketa ravis raf kaleko, an mi sidaon fo krae nogud insaet long asis.

^16-17 Mi no man fo faet, an prea long stretfala wei. Nomata olsem, mi gohed fo krae go-go ae blong mi i suelap nao, an i barava red fogud.

¹⁸ !Graon! Sapos mi dae, yu no haedem blad blong mi, hemi mas krae go olowe nao.

¹⁹ Yu save, distaem, witnes blong mi hemi stap nomoa long heven an hem nao bae hemi saet wetem mi long antap.

²⁰ Hem nao sapotem mi an hemi fren blong mi long taem wea tias blong mi i ran bikfala, bikos mi krae fogud go long God.

²¹ Hem nao save tok go long God abaotem kes blong mi, olsem wea man hemi askem samting fo fren blong hem.

Job hemi prea go long God

²² Laef blong mi hemi sot nao, an kolsap mi go nao long ples wea no eniwan save kambaek from hem.