Stori abaotem Job 14 - Pijin Bible

¹ Man hemi bon long woman, laef blong hem hemi sot tumas, an hemi garem staka hadtaem.

² Hemi grou kuiktaem olsem flaoa, an hemi dae kuiktaem tu olsem flaoa. Laef blong hem i save lus kuiktaem nomoa olsem sado.

³ ?So waswe nao yu laek fo lukluk long hem? ?An waswe nao yu laek fo kotem mi nomoa?

⁴ ?Waswe, eniwan save faendem man hu hemi klin long ae blong God? !Nomoa nao!

⁵ Yu makem finis haomas de an mans long laef blong man. Yu makem finis olsem, an hemi no save sens nao.

⁶ So plis yu no luk kam long hem, an letem hem fo stap go kasem taem wea hemi finisim hadwaka blong hem.

⁷ Sapos olketa katemdaon wanfala tri, hemi garem sans fo grou moa, an olketa niufala brans bae kamap.

⁸ Nomata rut blong hem i stat fo olo, an botom blong hem hemi drae,

⁹ taem hemi garem lelebet wata nomoa, bae hemi grou moa olsem wanfala yang tri.

¹⁰ Bat taem man hemi wik an hemi dae, hem nao en blong hem.

¹¹ Olsem riva wea hemi drae finis o leik wea hemi drae nao,

¹² taem eniwan hemi dae hemi no save kamap moa. Ya, sapos man hemi dae hemi no save wekap moa go-go kasem taem wea skae hemi finis.

¹³ Hemi gud tumas sapos yu haedem mi long ples blong olketa man dae. Mekem mi staphaed long ples ya go-go kasem taem wea kros blong yu long mi hemi finis. An yu mas makem taem wea mi stap long ples ya an no fogetem mi.

¹⁴ ?Waswe, sapos man hemi dae, bae hemi save laefbaek moa? Sapos hemi save hapen, bae mi weit go-go kasem taem wea trabol blong mi hemi finis.

¹⁵ Long taem olsem bae yu laek fo lukim mi hu yu bin mekem, bae yu kol kam long mi, an bae mi ansarem yu.

¹⁶ Long taem olsem bae yu lukluk falom wei blong mi, bat bae yu no makem moa olketa sin blong mi.

¹⁷ An bae hemi olsem yu putum nogud wei blong mi insaet long wanfala baeg an yu satem nao baeg ya mekem no eniwan save openem. Ya, bae yu kavaremap olketa sin blong mi nao.

¹⁸ Bat wea, olsem olketa maonten i gohed fo brek an foldaon, an olketa bikfala ston i foldaon from ples blong olketa, yu daonem tingting blong man.

¹⁹ Olsem wata hemi gohed fo brekemaot olketa bikfala ston, an bikfala ren hemi gohed fo wasimaot graon from olketa hil, yu tekemaot sans blong man fo garem wanem hemi laekem.

²⁰ Yu barava agensim man, an hemi lus finis. Yu kilim hem dae, an sendem hem go from disfala laef.

²¹ Nomata pipol mekhae long olketa pikinini blong man dae, bat hemi nating save nomoa. An nomata olketa meksem long olketa ya, hemi nating save tu.

²² Oltaem nomoa, man filim pein insaet long bodi blong hem, an hemi sore nomoa long hem seleva.