Stori abaotem Job 12 - Pijin Bible

Job hemi ansa

¹ Job hemi ansa olsem:

² !Ating yutrifala nao olketa barava waesman ya! Ating taem yutrifala dae, bae no eni waes man i stap nao long wol.

³ Bat wea, mi garem save olsem yutrifala tu. Mi tu mi smat long tingting olsem yutrifala. Evriwan i save nomoa long olketa samting wea yutrifala talem ya.

⁴ Nomata mi prea long God an hemi ansarem mi, mi kamap olsem wanfala man wea olketa fren i mekfan long hem. Ya, nomata mi stret an mi gud, olketa laf nogud long mi.

⁵ Olketa hu i garem gudfala laef i tokspoelem man wea trabol i kasem hem. Disfala wei hemi mekem moa trabol long olketa hu i kolsap foldaon.

⁶ Olketa man fo stil i stap gud long ples blong olketa. An olketa hu i mekem God hemi kros, olketa no wari long enisamting. Hemi olsem olketa holem god blong olketa long han blong olketa seleva.

⁷ Go askem olketa bed an olketa animol, olketa save talem yu an tisim yu plande samting abaotem God.

⁸ Go lukluk long laef blong olketa samting long graon an long solwata, hemi save mekem yu kamap waes

⁹ Evriwan long olketa i save wea Yawe nao hemi mekem olketa long han blong hem.

¹⁰ Evrisamting wea i laef, i stap nomoa insaet long han blong hem. An laef blong pipol tu, i stap long han blong hem.

¹¹ Olsem tang blong man hemi testem wea kaikai hemi suit o nomoa, ia blong man hemi traem toktok.

¹² Olketa olo nao i waes, an save tumas long olketa samting.

¹³ God nomoa hemi garem waes an paoa. An hemi save tumas an tingting gudfala nomoa.

¹⁴ Sapos hemi brekem daon samting, bae no eniwan save stanemap moa. An sapos hemi putum man long prisin, bae no eniwan save mekem fri moa.

¹⁵ Sapos God hemi stopem wata, bae i no save ren. An sapos hemi letem olketa riva fo ran bikfala, bae olketa spoelem evrisamting.

¹⁶ God hemi strong tumas, hemi winim olketa enemi blong hem olowe. Nomata man fo laea, o man hu i bilivim laea, tufala evriwan i insaet long han blong hem.

¹⁷ Hemi tekemaot olketa bikman an meksem long olketa, an hemi mekem olketa lida fo kamap krangge.

¹⁸ Hemi tekemaot paoa blong olketa king an hemi mekem olketa fo kamap olsem slev.

¹⁹ Hemi tekemaot olketa prist an meksem long olketa, an hemi spoelem paoa blong olketa sif.

²⁰ Hemi satem maos blong olketa man hu i talemaot gudfala toktok, an hemi tekemaot waes from olketa olo.

²¹ Hemi meksem long olketa hu i garem paoa, an hemi mekem olketa bikman fo wikdaon.

²² Hemi somaot ravis plan wea i staphaed long tudak, an hemi mekem laet fo saen long nogud samting wea i stap long tudak tu.

²³ Hemi mekem olketa kantri fo kamap strong, an hemi spoelem olketa tu. Ya, hemi mekem kantri fo garem plande pipol, an hemi aotem olketa from kantri tu.

²⁴ Hemi mekem olketa sif fo lusim save, an wakabaot nating long ples nogud.

²⁵ Olketa lus insaet long barava tudak. Ya, olketa foldaon olobaot nomoa olsem olketa man wea i drang.