Stori abaotem Job 11 - Pijin Bible

Fas toktok blong Sofa

¹ Nao Sofa from Naama hemi tok olsem:

² Mi mas ansarem olketa ravis toktok ya. Wei wea man hemi bikmaos tumas olsem hemi nating som dat hemi stret.

³ ?Waswe, yu tingse mitrifala mas stap kuaet? Olketa toktok blong yu i nogud, so mitrifala mas tokstrong long yu.

⁴ Yu talem dat olketa samting wea yu tingim hemi stret. An yu talem dat laef blong yu hemi klin long ae blong God.

⁵ !Man, God nomoa save ansarem yu! Mi laekem tumas fo hemi tok long yu.

⁶ Hemi save talem yu dat waes tingting hemi garem plande pat long hem, an hemi had tumas fo save long barava waes tingting. Yu mas save dat God hemi panisim yu long wei wea i smol tumas winim wanem hemi fitim sin blong you.

⁷ ?Waswe, yu tingse yu save long olketa dip samting abaotem God? ?Waswe, yu save kasem en blong paoa blong God hu hemi garem evri paoa?

⁸ Paoa blong God hemi hae tumas winim skae, an hemi barava had tumas fo yu save long hem. Olketa dip samting i dip tumas winim grev, bat yu nating save nomoa long ples ya.

⁹ Paoa blong God hemi bikfala moa winim disfala wol, an hemi waed moa winim solwata.

¹⁰ ?Sapos God hemi kam putum yu insaet long prisin, an hemi kotem yu, bae wanem nao yu save duim?

¹¹ Hemi savegud long olketa man hu i ravis tumas, an hemi luksave long olketa nogud samting wea olketa duim.

¹² Man wea hemi no garem save, bae hemi kamap waes long taem wea wael dongki hemi bonem pikinini wea hemi kuaet an fitim vilij.

¹³ Bat yu mas stretem tingting blong yu, an liftimap han blong yu fo prea go long God.

¹⁴ Yu mas lusim olketa nogud wei blong yu, an yu mas no letem eni ravis samting fo gohed long ples blong yu.

¹⁵ Taem yu duim olketa samting ya, bae yu no filsem, an tingting blong yu bae hemi strong, an bae yu no save fraetem enisamting.

¹⁶ An bae yu save fogetem olketa trabol blong yu. Ya, bae yu tingim nomoa trabol ya olsem flad wea hemi finis.

¹⁷ Laef blong yu bae hemi gudfala moa, an hemi saen winim san wea hem saen long midol long de. An dak taem long laef blong yu bae hemi finis, an bae hemi olsem san wea hemi kamap long moning.

¹⁸ Bae yu save stap gudfala, an tingting blong yu bae hemi strong. An God bae hemi lukaftarem yu, an hemi mekem yu res gudfala.

¹⁹ Ya, bae yu save slip gudfala, an no eniwan save mekem yu fraet. An plande pipol bae tinghae long yu.

²⁰ Bat ae blong olketa nogud pipol bae i sat fogud nao. Bae olketa lukraon, bat olketa nating save hao fo lusim trabol. Wanfala samting nomoa bae olketa laekem tumas, olketa laek fo dae nomoa.