Stori abaotem Job 10 - Pijin Bible

Job hemi komplen long God

¹ Mi les nao long laef blong mi. So bae mi talemaot komplen blong mi. Ya, bae mi tokaot long wei wea mi barava filnogud nao.

² Bae mi sei long yu God, Yu mas no talem dat mi fit fo panis, bat yu mas talem kam long mi wanem nao mi duim rong.

³ ?Yu tingse hemi gudfala samting nao fo mekem mi safa? Yu mekem mi, bat distaem yu les long mi. Hemi luk olsem yu hapi long wei blong olketa nogud pipol.

⁴ ?Waswe, yu garem ae olsem man? ?Waswe, yu save luksave long olketa samting olsem mifala save duim?

⁵ ?Waswe, laef blong yu hemi sot nomoa olsem laef blong man?

⁶ !Oraet! ?Waswe nao yu aftarem mi fo faendemaot olketa sin blong mi? ?Waswe nao yu trae fo faendemaot evri smolfala rong samting wea mi bin duim?

⁷ Yu save finis wea mi nating duim eni nogud samting. An yu save tu wea no eniwan save sevem mi from paoa blong yu.

⁸ Yu nao yu mekem mi. Ating distaem yu seleva tu bae yu spoelem mi.

⁹ Yu tingim fastaem, wea yu nao bin mekem mi long graon. ?Waswe, bae yu krasim mi, mekem mi kamap moa olsem dast?

¹⁰ Yu nao yu mekem wata blong dadi blong mi i go insaet long bele blong mami blong mi. An yu mekem mi grou insaet long bele blong hem.

¹¹ Yu nao yu joenem olketa bon insaet long bodi blong mi, an yu kavaremap olketa bon ya long mit an skin.

¹² Yu nao yu givim laef long mi, an yu kaen long mi olowe. Yu nao yu lukaftarem laef blong mi,

¹³ Bat distaem mi luksave nao wea yu bin gohed fo haedem tingting blong yu. An mi save dat hem yu haedem plan fo spoelem mi.

¹⁴ Evritaem yu lukluk nomoa long mi fo lukim taem mi sin, mekem yu no talem dat mi stret nomoa.

¹⁵ Taem mi sin, mi barava nogud tumas long ae blong yu. Bat nomata mi stret, mi filnogud an mi barava filsem. Ya, mi fulap long sem nao.

¹⁶ Taem mi trae fo som dat mi stret nomoa, yu aftarem mi olsem wanfala laeon fo spoelem mi. An yu somaot bikfala paoa blong yu fo spoelem mi.

¹⁷ Oltaem yu garem olketa witnes wea i agensim mi. Kros blong yu long mi hemi gohed fo kamap bikfala moa. An yu gohed olowe fo sendem kam plande niufala witnes agensim mi.

¹⁸ ?Waswe nao yu letem mi bon kam ya? Mi fil olsem hemi fitim fo mi dae taem no eniwan lukim mi yet.

¹⁹ Mi fil olsem hemi moabeta sapos taem mi bon kam mi bin go stret insaet long grev nomoa.

²⁰ Plis yu no duim enisamting moa long mi. Laef blong mi hemi kolsap finis nao, so letem mi hapi fo lelebet taem.

²¹ Kolsap fo mi go nao, an bae mi no save kambaek moa. Bae mi go long ples wea hemi tudak, an wea hemi nating garem eni laet long hem.

²² Tudak nomoa hemi stap long ples ya, an no enisamting hemi stret long hem. Long ples ya, no eni laet nao hemi stap, bikos laet ya hemi olsem tudak nomoa.