Sams 124 - Pijin Bible

(Toktok go long olketa pipol.)

¹ ?Hao nao sapos Yawe hemi no bin saet wetem yumi long faet? Yumi long Israel mas tok olsem,

^2-3 “Nomata olketa enemi i bin kros tumas long yumi, olketa no save faetem yumi an spoelem yumi nogud, bikos Yawe nao hemi saet wetem yumi.

^4-5 Nomata olketa bin kam fo spoelem yumi olsem wata wea hemi flad an draonem yumi, olketa enemi ya i no save spoelem yumi finis bikos Yawe hemi bin saet wetem yumi.” Hem nao yumi long Israel mas talem.

⁶ Yumi mas tengkiu long Yawe, bikos hemi no letem olketa enemi fo kam an spoelem yumi.

⁷ Yumi bin fri olsem wanfala bed wea hemi ranawe from trap wea hemi brek.

⁸ Yawe hu hemi mekem skae an graon, hem nao hemi helpem yumi. (Olketa singim disfala singsing taem olketa goap fo fist long Jerusalem.)