Ropaskre gilja 5 - O Debleskro Drom 2021 (Sinte)

An men pale pash tute pale!

¹ Baro Dewel, ma biste, hoi mentsa djas! Dik ap mende un dik mari ladj!

² Ko them, hoi men dal, hi an i wawarengro wast. Un an mare khera djiwenn wi-themarja.

³ Muklo ham, mare dada hi buder gar koi. Mare daja hi har djuwja, kolengro rom meras.

⁴ Maro pani hunte plaissras mare lowentsa, un maro kasht hunte plaissras ninna.

⁵ Kolla, kai men palla lenna, beshenn menge ap i meen. Ninna te ham khino, mukenn le men gar tele te beshell.

⁶ Mer hunte rikras mare wasta i themma Egiptia un Assur koi, te well men i kotar maro, te bokas gar.

⁷ Mare phure anan doosh ap pende, un djiwenn buder gar. Mer kitse kai ham, hunte hidjras lengri tseli doosh.

⁸ Budepangre hi i raja pral mende, un kek hi koi, kai lell men win dran lengre wasta.

⁹ Te djah win, te las chapen dren, hunte daras maro djipaske. Kurepangre dran o mulo them kamenn men o chareha te marell.

¹⁰ Har te hams an i bob, chatchell mari hauta koi bari bokatar.

¹¹ I djuwjen an o foro Zion tapran le sorjah an, ninna i terne tchen an i forja o themestar Juda.

¹² I pralstune mursha wan lendar i dorjentsa pre pandlo, un ap i phurende dikan le gar pre.

¹³ Terne mursha hunte hidjran jarrengre barra, un tchawe peran tel o bud kasht, hoi hunte hidjran le.

¹⁴ I pralstune hi buder gar beshdo an o foreskro wudar. Un i terne mursha bashrenn buder gar ap i dorjengre bashepangre.

¹⁵ Mare djia giwenn buder gar, maro khelepen hi kanna maro ropen.

¹⁶ Mer nashram maro railepen. Mari doosh, hoi anam ap mende, anas men an i bibacht!

¹⁷ Doleske hi maro dji nasselo, un mare jaka wi-rowedo,

¹⁸ te dikah mer ap i berga Zion, kai li jaake mulo koi tchiddo hi, un i diwje djukle pral late nashenna.

¹⁹ Tu, baro Dewel, hal hako tsiro koi. Tu hal un atcheh o rai hako tsireske.

²⁰ Hoske kameh tu men te bistrell, un maro tselo djipen tchi mendar te djinell?

²¹ An men, baro Dewel, pale pash tute, te was pale khere! Kre, te djal menge pale latches har an o phuro tsiro!

²² Witsral men tutar krik hako tsireske? Nai djal tiri choli pral mende gar krik?