Jesaja 18 - O Debleskro Drom 2021 (Sinte)

O Debleskre laba pral o them Etiopia

¹ Djungeles djal o themeske Etiopia, ko themeske pash i bare lengste panja, kai jaake bud stepangre hi.

² Kau them bitchrell peskre bitchepangren pral o baro pani. An tikne shiffe ulerenn le pral i panja. Tumer sik bitchepangre, djan pash kol menshende, kai hi baro un djeteha dren maklo, pash koi natsjona, kolendar i menshe darenna an hake themma, pash kolende, kai bari sorjah i wawarende khetne stakrenn, an kolengro them bare lengste panja nashenna.

³ Denn jak, tumer menshe, kai ap i phub djiwenn, te rikrell jek o themeskri plachta pre pral ap i berge, palle denn jak! Un te phurdell jek an i phurdepaskri, palle shunenn koi!

⁴ O baro Dewel penas ap mande: Fun pral dran miro kheer lau an i jak, hoi djala ap i phub, un atchau pokones har o tatepen mashkral o diwes, un har i sapeni wolka an o tato tsiro, kai o djob dren anlo well.

⁵ Ap ko tsiro, kai i drake bares wenn, glan kowa kai le dren lino wenn, tchinell o baro Dewel peskro tchurjeha i newe kashta tele. Ninna kolla, kai lengsto un sano hi, dell lo tele.

⁶ Un kolla lauter mukell lo tchiddo i tchirklenge, kai mass chan ap i berge, un i diwje viechenge ap i phub. Un kol tchirkle chan kolendar o tselo nijal un kol diwje vieche o tselo wend.

⁷ An ko tsiro wenna kol mursha, kai jaake baro un djeteha dren maklo hi, dran koi natsjona, kolendar i menshe darenna an hake themma, kolla, kai bari sorjah i wawarende khetne stakrenn, un an kolengro them bare lengste panja nashenna. Jon wenna un anenn kutch koowa o baro Debleske, ko rajeske pral o bolepen un i phub. Kowa anenn le pash i berga Zion, kote kai job khere hi.