Hiob 29 - O Debleskro Drom 2021 (Sinte)

¹ Un o Hiob rakras pale un penas kal laba:

² Ach, te woms pale har an ko tsiro, hoi pal mande hi, har an kol bersha, kai o Dewel ap mande jak das,

³ har leskri momeli pral miro shero his, un me jaake an i kali rat nai trujel djom,

⁴ har his man gomme miri tseli soor, un o Dewel miro maal his, un jak das ap miro kheer,

⁵ har o sorelo Dewel mantsa his, un mire tchawe trul mande his,

⁶ har dan mire grumja un busja budeder har doha thud, un mire djeteskre ruka jaake bud djet dan, te nashas lo har pani win dran o bar, kai wan i djeteskre drake tiknes kerdo!

⁷ Har djom me pre an o foreskro baro wudar, un beshom man pash i pralstunende,

⁸ dikan man i terne un djan ap i rig, un i phure stan pre un atchan tardo.

⁹ I pralstune rikran pengre laba pale, un tchiwan pengro wast ap o mui.

¹⁰ Ninna i bare mursha o forestar rakran buder gar, un rikran pengro mui.

¹¹ Hakeno, kai shunas man, sharas man. Un koon man dikas, rakras latcho koowa pral mande.

¹² Me wom ko tchorweleske ap i rig, kai ap mande gole das. Un ko tchawo, koleskro dad meras, un leske kek buder koi his, koleske homs me koi.

¹³ Kolla, kai merans, te woms gar koi, rakran i bacht pral mande win. Un me krom, te giwas o dji kolatar, kolakro rom meras.

¹⁴ Hako tsiro krom, hoi tchatcho hi. Un miro tchatchepen his ap mande, har te wals lo miro ripen un miri stadi.

¹⁵ O koreleske homs me har i jak, un i heri koleske, kai nai nashell gar.

¹⁶ O tchorweleske homs me har i dad, un lom koleskro koowa an o wast, kai i wi-themari his.

¹⁷ I tchilatcheske dom i danda paash, un tserdom koles dran leskro mui, hoi kamas lo te chal.

¹⁸ An ko tsiro patsom, te wau i phuro mursh, un merau an o latcho phurepen mank mire tchawende.

¹⁹ Me homs har i ruk, koleskre draba djan bis pash o pani, un koleskre kashta wenn sapeno haki rat.

²⁰ Pash i menshende homs hako tsiro an-diklo, un lom pale te pale newi soor.

²¹ Jon shunan, hoi man penepaske his. Un rakran tchi, bis te penom lenge, hoi te krenn le.

²² Pal mande penas buder kek wawar tchomone. Mire laba peran ap lende tele har latcho brishin.

²³ Jon dikan ap mande, te rakrap, har kamenn le, te well brishin. un pijan mire laba, har i hachetikri phub o brishin pijell.

²⁴ Te his lenge ropaske, som kamles ap lende. Un har dikom latches ap lende, lan le pale newi soor.

²⁵ Me homs lengro pralstuno, un rodom lenge o drom win. Un djiwom mank lende har i baro rai mashkral peskre lurdende. Un rakrom latches kolentsa, kolenge ropaske his.