Debleskri gili 90 - O Debleskro Drom 2021 (Sinte)

O Dewel atchell hako tsiro, o mensho atchell gar

1 O mangepen o Mosestar, ko Debleskro murshestar.

¹ O mangepen o Mosestar, ko Debleskro murshestar. Baro Dewel, maro rai, tu hal kowa, pash koleste nai wah un khere ham.

² Glan i berge kerdo wan, un tu i phub kral, hals tu, o Dewel, koi. Un tu atcheh hake tsirja.

³ Tu penell menge: “Awenn pale, tumer menshe!” Un mukeh men pale tchik te well.

⁴ Jek sero bersha hi pash tute har jek diwes, har ko diwes, hoi taissar his, un buder gar koi hi, un har i tikno tsiro an i rat.

⁵ Har i lengsto pani sik dureder nashell, jaake mukeh mare diwessa dureder te nashell. Maro djipen hi tikno har i sopen. Mer ham har i senlepen, hoi taissarlakro dran i phub well,

⁶ bares well un shukar hi, un rati tele merell un truk well.

⁷ Dran tiri choli merah jaake sik. Tiri choli khossell men krik.

⁸ Maro tchilatcho koowa hoi kram, tchiwal tu glan tute tardo. Mari khatedi doosh tchakreh tu pre.

⁹ Dran tiri choli djan mare diwessa tchitcheske trujel. Mare bersha djan jaake sik har te phurdell jek o ducho win.

¹⁰ Maro djipen hi 70 (efta-deesh) bersha, te hi bud, 80 (ochta-deesh) bersha. Un kowa, hoi menge shukar his, hi tchi har budi un pharepen. Un sikeder har sik hi lauter trujel.

¹¹ Koon patsell, te nai well tiri choli jaake baro? Un koon darell tiri choljatar?

¹² Sike men, har sik maro djipen trujel hi, te was mer gosewo.

¹³ Baro Dewel, har rah kameh te choireh tut ap mende? Dik pale latches ap mende, tire budepangre!

¹⁴ Haki tsalla kre maro djipen pherdo tiro latchepen! Palle sharah tut un giwah tuke gilja jaake rah har djiwah.

¹⁵ I rah tsiro hams tele rikedo. De men kanna jaake bud bachtele bersha, har hams an i bibacht.

¹⁶ Mer tire budepangre kamah te dikas o baro koowa, hoi tu kreh. Muk mare tchawen tiro railepen te dikell!

¹⁷ Tu rai, maro Dewel, dik latches ap mende, un tchip tiri bacht ap kowa, hoi mare wastentsa krah. Awa, muk mari budi mishto te djal!