Debleskri gili 84 - O Debleskro Drom 2021 (Sinte)

Miro dji nashell pal o Debleskro kheer

¹ I gili jekestar dran i familja Korach. Kai gili hi o rajeske pral i gipangre, te giwell pash o bashepen ap i bashepaskri, hoi kharella Gittit.

² Tu, baro Dewel un rai pral o bolepen un i phub, har kamau me tiro kheer o djijestar!

³ Miro dji nashell pal tiro kheer, baro Dewel. Kamau te wap dren ap i platsa glan tiro kheer. Miro tselo djijeha giwau bachtele gilja tuke, o djido Debleske.

⁴ O tchirklo hatsas peske i kheer, un o khereskro tchirklo kras peske i kheer peskre tchawenge, gar dur kotar, kai tu sharedo well. Tu baro Dewel un rai pral o bolepen un i phub, tu hal miro baro rai un miro Dewel.

⁵ Bachteles hi kolla, kai djiwenn an tiro kheer. Hako tsiro hadenn le tut.

⁶ Bachteles hi kol menshe, kolengri soor an tute hi, un kai o djijestar pash tiro kheer djan.

⁷ Te djan le an o tato them, nashell kote pani lenge win. Un o brishin mukell lauter senelo un baro te well.

⁸ Pale te pale lenn le newi soor, bis te dikenn le o tchatcho Debles ap i berga Zion.

⁹ Tu baro Dewel un rai pral o bolepen un i phub, shun miro mangepen! Muk les glan tute te well, tu o Jakobeskro Dewel!

¹⁰ Dik latches ap o baro rajeste, koles menge ap mari rig tchiwal! Dik ap leste, koles win rodal, te well lo maro rai!

¹¹ Jek diwes ap i platsa glan tiro kheer hi feteder har i serja wawar diwessa. Me kamau budeder te wap tardo pash o wudar glan tiro kheer, har te djiwap pash i tchilatchende.

¹² Maro baro Dewel hi o kham maro djipaske. Job rikrell peskre wasta pral mende. O baro Dewel dell men latchepen un railepen. Kolen, kai o djijestar ap leste shunenna, dell lo hako latchepen, hoi len hunte wella.

¹³ Tu baro Dewel un rai pral o bolepen un i phub, bachtelo hi ko mensho, kai rikrell pes ap tute.