Debleskri gili 75 - O Debleskro Drom 2021 (Sinte)

O Dewel hi o tchatchepaskro rai

¹ I gili o rajeske pral i gipangre, te giwell har koi gili ‘Ma mare men’. Kai gili kras o Asaf.

² Mer sharah tut, maro Dewel. Mer parkrah men pash tute, te hal pash mende, un rakrah halauterestar, hoi tu kral an tiri bari soor.

³ “Te was miro tsiro”, penell o Dewel, “rakrau o tchatchepen win pral hakeneste.

⁴ Ninna te trissell i phub un lauter, kai djiwell koi pre, me rikrau lat, te atchell li soreles tardo.”

⁵ Me penom ap kolende, hoi pen bares krenn: ‘Ma phurdenn tumen jaake pre!’ Un ap i tchilatchende penom: ‘Ma hadenn tumen!

⁶ Atchenn! Ma hadenn tumen! Mukenn tele tumaro tchilatcho rakepah!’

⁷ Tchatcho barepen well gar kotar, kai o kham pre-djala, un gar kotar, kai o kham tele djala, witar gar dran o mulo tato them.

⁸ Na-a, o Dewel hi o tchatchepaskro rai, kai ko jekeske i soor krik lell, un o wawares bares krell.

⁹ O baro Debles hi o khoro an o wast pherdo soreli mool, hoi job dren tchoras. Un i tsele tchilatche ap kai phub hunte pijenn lat, bis te buder kek mool an o khoro hi.

¹⁰ Me kamau o Deblestar te rakrell hako tsiro. Un leske, ko Jakobeskro Debleske, giwau un bashrau.

¹¹ Maro Dewel, tu phageh i soor i tchilatchendar, un deh i soor kolen, kai an o tchatchepen tardo hi.