Debleskri gili 65 - O Debleskro Drom 2021 (Sinte)

O Debleskro latchepen hi baro

¹ I gili o rajeske pral i gipangre. Kai gili kras o David.

² Tu, Dewel, kai djiweh ap i berga Zion, tu hal moldo, te sharas tut, un rikras mare sobja, hoi tuke dam.

³ Tu shuneh, hoi tutar mangah. Doleske wenn i tsele menshe pash tute.

⁴ Ko tchilatchepen, hoi krom, hi phares ap mande tchiddo. Tu hal kowa, kai i doosh krik lell.

⁵ Har bachtelo hi kowa, koles tu tuke win rodal, un mukeh les pash tute te well, te djiwell lo ap i platsa glan tiro kheer. Kowa well tchalo o latchepastar an tiro railo kheer, kai tu djiweh.

⁶ Tu rakreh mentsa dran baro koowa, hoi tu kreh an tiri soor un an tiro tchatchepen. Tu, Dewel, leh men win dran o tchilatchepen. Ap tute dikenn i menshe ap i tseli phub. Ninna kolla dikenn pal tute, kai djiwenn pash i bare panja, hoi jaake dur krik hi.

⁷ Tiri sorjah tchiwal tu i berge soreles ap i phub, un tchiwal tiri bari soor trul tute har i ripen.

⁸ Tu peneh ap o diwjo pani: “Muk tele”, un ap o pani, hoi dur pre djal: “Tchip tut”, un ap koi diwji gole, hoi i menshe an wawar themma krenna: “Atch kanna!”

⁹ Un i menshenge ap i tseli phub atchell o rakepen krik glan ko baro koowa, hoi tu kral. Kotar, kai o kham pre djal bis kote, kai lo tele djal, mukeh tu halauteren te sal un bachteles te well.

¹⁰ Tu djineh, hoi o themes hunte well, un deh jak, te well les doha pani, un kreh les braweles. Miro Dewel, tut hi hako tsiro doha pani. Tu mukeh bud djob bares te well i menshenge.

¹¹ Koi hachetikri phub deh tu doha te pijell, un kreh i phub sapeno, un deh brishin, te well lauter bares.

¹² Tu deh bud latcho koowa un kreh, te well o bersh i latcho bersh. Kote kai tu brishin dal, well jaake bud latcho koowa win, te hi budeder har doha koi.

¹³ Kote, kai i bakre djan, hi lauter pherdo senlepen, un ap i berge shunah khelepen un bashepen.

¹⁴ O pralstuno them hi pherdo bakre. Un ap o telstuno them hi o djob tardo pesso un thullo. Un lauter stenn un giwenn.