Debleskri gili 64 - O Debleskro Drom 2021 (Sinte)

O Dewel hi sorleder har kolla, kai rakrenn tchilatche tchipjentsa

¹ I gili o rajeske pral i gipangre. O David kras kai gili.

² Miro Dewel, shun har ap tute rowau. Man hi daar glan kolende, kai kamenn man te marell. De jak ap miro djipen!

³ Kol tchilatche wenn khetne un rakrenn, har jon nai krenn mange tchilatchepen. Khate man, miro Dewel, glan lengri choli!

⁴ Lengre tchipja hi har chare, hoi mishto tchinenna, lengre laba dukrenn har faile.

⁵ Ap jek kopo denn le karje dran pengro khatepen ap koleste, kai o tchatcho drom djal, un ladjenn pen gar.

⁶ Jek krell o wawares soreles an lengro tchilatcho koowa. Un jon rakrenn pen tele, har nai tchiwenn le dorja win, te perenn i wawar dren, un penenn pashel: “Koon dikell kowa?”

⁷ Len hi tchilatchepen an o shero, un penenn tchorchanes: “Jaake krah mer kowa. Jaake djal kowa mishto. Har gosewe ham mer!”

⁸ O Dewel dell ap lende karje. Sik hi le ap i phub tchiddo.

⁹ Lengre laba kokres krenn, te san kolla pral lende, kai dikenn len.

¹⁰ Un lauteren taprell i daar, un jon penenn: “Kawa kras o Dewel”, un haiwenn, te was kowa lestar.

¹¹ Kolla, kai an o tchatchepen tardo hi, hi bachtelo pral o baro Debleste, un rikrenn pen ap leste. Un hakeno, kai shunell ap o Debleste o djijestar, sharell pes leha.