Debleskri gili 63 - O Debleskro Drom 2021 (Sinte)

Miro dji djal pal miro Debleste

¹ I gili o Davidestar. Job kras kai gili an o mulo tato them Juda.

² Dewel, tu hal miro Dewel. Tut rodau me o djijestar. Miro dji djal pal tute. Man hi trush pal tute har i truk tato them trushell pal o pani.

³ An tiro kheer rodau tut, kamoms te dikap tiri soor un tiro railepen.

⁴ Tiro latchepen hi mange budeder moldo har o djipen. Doleske sharau tut.

⁵ Me parkrau man pash tute jaake rah har me djiwau. Un me hadau mire wasta pre, te mangap tut an.

⁶ Tu kreh miro dji jaake tchalo un bachtelo, har te chap i shukar chapen. Miro mui giwell tuke i gili un sharell tut.

⁷ Me te hom ap o tchiben tchiddo, weh tu mange an o shero. An i rat, kai me sowau gar, rakrau tuha an miro dji.

⁸ Tu wal ap miri rig, Tu rikreh tiro wast pral mande, har i tchirklo rikrell peskre mussja pral peskre ternende. Kote giwau tuke i bachtjatar i gili.

⁹ Miro dji rikrell pes ap tute. Tiro tchatcho wast rikrell man.

¹⁰ Kolla, kai kamenn man mulo te dell, mu merenn le, un djan tele an o mulengro them!

¹¹ Mu dell len o charo mulo, un i diwje djukle te chan len!

¹² O baro rai hi bachtelo pral o Debleste. Koon dell pes sowel glan o Debleste, kowa nai sharell pes. Un i chochenenge well o mui pandlo.