Debleskri gili 62 - O Debleskro Drom 2021 (Sinte)

Pash o Debleste hi man kek daar

¹ I gili o rajeske pral i gipangre, o Jedutun. Kai gili kras o David.

² Pash o Debleste kokres hi miro djijes kek daar, Job well ap miri rig.

³ Job hi mange har i baro sorelo kheer ap i barreskri berga, kai man khatrau, un job ap mande jak della, jaake te perap gar.

⁴ Har rah djan tumer lauter ap jek mursheste, te denn les mulo? Hom buder tchi har i bango kheer, hoi kamell dren te phagell, un koleskre barra buder gar khetne rikrenna.

⁵ Tumenge djal an o shero trujel, har nai krenn te perap khetne. O chochepen hi tumenge shukar. Tumare mujentsa rakrenn tumer i bacht win pral jekeste, un an tumare djia rakrenn i bibacht pral leste.

⁶ Pash o Debleste kokres hi miro djijes kek daar! Djinau, job hi, kai krell halauter mishto.

⁷ Job hi har i baro sorelo kheer ap i barreskri berga, kai man khatrau, un job ap mande jak della, jaake te perap gar.

⁸ Miro Deblestar well, te wap win lino dran o tchilatchepen, un te wap an-diklo. Lestar well miri soor, pash miro Debleste khatrau man.

⁹ Dikenn ap leste hako tsiro, tumer, leskre menshe! Tchorenn tumare djia win glan leste! Pash o Debleste nai khatrah men.

¹⁰ I menshe hi tchi har i ducho. Tikne har bare hi tchi moldo. Te wans le ap i waga tchiddo, wans le lauter khetne lino gar phareder har i ducho.

¹¹ Ma patsenn, te lenn brawlepen, te djan ap jekeste i sorjah pre! Ma patsenn, te krell tumen kowa brawelo, hoi tchoran! Ninna te wenn brawleder un brawleder, ma tchiwenn tumare djia pre!

¹² Budeder har jek kopo shunom: O Dewel kokres hi sorelo,

¹³ un leskro latchepen hi baro. Tu, miro rai deh hakenes pal kowa, hoi job kras.