Debleskri gili 60 - O Debleskro Drom 2021 (Sinte)

O mangepen kol menshendar, kai patsenn, te wan le o Deblestar bistedo

¹ I gili o rajeske pral i gipangre te giwell pash o bashepen ap i dorjengri bashepaskri. O David kras kai gili, te sikrell lo mende tchomone.

² Job kras lat an ko tsiro, har lo an o marepen his i menshentsa Aram dran Mesopotamia un Zoba. Har was lo pale, maras o Joab i Edomarja an i Londi Tala: deesh-te-dui serja murshen.

³ Miro Dewel, tu tchiwal men pale, un tradal men kate te kote. Bari choli hi tut ap mende. Rake mentsa pale latches!

⁴ Tu kral, te trissas i phub jaake, te phagas li. Kre lat pale tseles, te phagell li gar khetne!

⁵ Tu mukal tire menshen pharo koowa te dikell. Tu dal men sawi mool te pijell, te wam mato.

⁶ Kolen, kai tuha djiwenna un ap tute shunenna, sikral, har te nai nashenn le penge glan i lurdende.

⁷ Ab ap mari rig tiro sorelo wasteha un le men, tire malen, win! Shun, har dah ap tute gole!

⁸ O Dewel penas an peskro kheer, kai job djiwell: “Me wom o sorleder”, “Me dau o foro Sichem mire menshende, un ninna i tala Sukkot.

⁹ O them Gilead hi miro un o them Manasse hi miro. O them Efrajim hi miri sasterni stadi, un o them Juda hi kowa, koles penepaske hi.

¹⁰ O them Moab hi miro thopaskro tcharo. Ap o them Edom witsrau miro kirach. Pral i Filistarja dau gole: Me hom o sorleder!”

¹¹ Koon anell man an ko sorelo foro? Koon anell man an o them Edom?

¹² Koon nai krell kowa, har tu kokres, maro Dewel? Tu mukal men un djah gar win mare lurdentsa an o kurepen.

¹³ Ab tu ap mari rig un le men win dran i tchilatche wasta! Te hi menshe ap mari rig, hi kowa tchitcheske un tchi moldo.

¹⁴ Maro Debleha krah mer baro koowa. Un job stakrell kolen khetne, kai jaake soreles ap mende djan.