Debleskri gili 59 - O Debleskro Drom 2021 (Sinte)

O mangepen jekestar, koleske bud mursha tchilatchepen kamenn

¹ I gili o rajeske pral i gipangre, te giwell har koi gili ‘Ma mare men’. O David tchinas kai gili an ko tsiro, har o Saul peskre lurden trul leskro kheer tardo tchiwas, te denn le les mulo.

² Le man win dran i wasta kolendar, kai kamenn mange tchilatchepen, miro Dewel! An man krik kolendar, kai ap mande djan!

³ Le man win dran i wasta kol tchilatchendar, kol menshendar, kai kamenn te dikell, har miro rat nashell.

⁴ Dik, baro Dewel, har jon lurenn, te marenn le man! Fothe krom me tchi, un kek doosh ap mande hi, djan sorele mursha khetnes ap mande.

⁵ Ninna te krom me kek tchilatchepen, nashenn le kai, te denn le man mulo. Ste pre! Ab un dik les tuke kokres an!

⁶ Baro Dewel, tu, kai hal o rai pral o bolepen un i phub, un o Israeleskro Dewel, ste pre un de kol menshen an i tsele wawar themma pengri phagi! Ma ab latches ap kolende, kai phukepangre hi!

⁷ Haki rat wenn le pale un nashenn tchorchanes trul o foro. Har djukle denn le gole.

⁸ Tchilatchepen well dran lengro mui win. Lengre laba tchinenn har chare. Jon patsenn, te shunell len kek.

⁹ Tu, mo baro Dewel, tu saneh pral lende. Awa, tu saneh pral kol menshende an kol tsele wawar themma.

¹⁰ Tu hal miri soor. Ap tute kamau me man te rikrell. Miro Dewel, tu hal mange i sorelo kheer.

¹¹ Tu hal latches ap mande. Tu hal ap miri rig un mukeh man sorleder te well har kolla, kai kamenn man te marell.

¹² Ma de len mulo, te bistrenn kowa mire menshe gar! Trade len tiri sorjah, te nashenn le kate te kote! Stake len tele, tu, kai rikreh tiro wast pral mende.

¹³ Jon praassenna un chochenna. Hako labeha, hoi jon penenn, dukrenn le tut. Muk lengro pre-phurdepen i shello lenge te well, jaake te hunte perenn le, un wenn kokres dren pandlo.

¹⁴ De len mulo an tiri bari choli! De len mulo, te atchell lendar tchi, jaake te dikell hakeno ap i tseli phub, kai tu, maro Dewel, o rai hal pral o Israel.

¹⁵ Un haki rat wenn le pale, nashenn trul o foro trujel, un denn gole har i djukle,

¹⁶ hoi nashenn trujel, te rodenn le penge chapen. Un te wenn le gar tchalo, sikrenn le pengre danda.

¹⁷ Me kamau tiri sorjatar te giwell. Taissarlakro sharau tiro latchepen. Tu hal mange i sorelo kheer, un i khatepen an kol diwessa, kai mange ropaske hi.

¹⁸ Tu hal miri soor. Tuke kamau te bashrell, miro Dewel. Tu hal mange i sorelo kheer. Tu hal ko Dewel, kai mange latches hi.