Debleskri gili 58 - O Debleskro Drom 2021 (Sinte)

O Dewel hi o tchatchepaskro rai pral i phub

¹ I gili o rajeske pral i gipangre, te giwell har koi gili ‘Ma mare men’. O David tchinas kai gili.

² Tumer sorele, rakrenn tumer tchatchepah o tchatchepen win pral i menshende? Denn tumer hakeneste peskro tchatchepen?

³ Na-a, kowa krenn tumer gar. Tumer kamenn o tchilatchepen te krell. Tumare wastentsa krenn djungelo koowa.

⁴ I tchilatche peran o tchatcho dromestar tele, jaake rah har jon boldo wan. Fun tiknes pre djan le i chocheno drom.

⁵ Lengro rakepen marell har i tchip i tchilatcho sapestar. Jon hi har i sap, hoi nashte shunell gar.

⁶ Jon pandenn pengre kanda har i sap, kai kamell gar te shunell, hoi o durkepaskro ap leste rakrell, ninna te haiwell lo mishto i sapentsa te rakrell.

⁷ De lenge i danda dren, miro Dewel! Phage lengre lewengre danda win, miro baro Dewel!

⁸ Kre te atchenn le gar djido, un hunte krik djan har pani, hoi an i phub nashell. Te tchiwenn le pengre faile an, muk len tele phagenn.

⁹ Jaake har i momeli tele chatchrell, un buder gar koi hi, un jaake har i ternepen, hoi mulo boldo well un o kham gar dikas, jaake te atchenn jon witar gar.

¹⁰ Lenge djal har i subjengre burra: I baro ducho tserdell len dran i phub win. Jaake phurdell o Dewel len krik an peskri bari choli.

¹¹ O dji kolendar well bachtelo, kai hi an o tchatchepen tardo, te dikenn le, kai lenn i tchilatche pengri phagi. An kolengro rat thowenn le pengre pire.

¹² Un i menshe penenna: “Kowa, kai o tchatchepen kras, lell peskro plaissepen. Awa, o Dewel hi o tchatchepaskro rai pral i phub.”