Debleskri gili 56 - O Debleskro Drom 2021 (Sinte)

O mangepen jekestar, ap koleste bud mursha djan

¹ I gili o rajeske pral i gipangre, te giwell har koi gili ‘I tauba an i dur them.’ Kai gili kras o David, har tapran les i Filistarja an o foro Gat.

² Miro Dewel, ab latches ap mande, i menshe lenn man palla! Hako diwes djan le ap mande pre, un krenn mange o djipen phares.

³ Kolla, kai kamenn mange tchilatchepen, lenn man hako diwes palla. Bud djan pre-phurdemen ap mande.

⁴ Ap ko diwes, kai man i daar taprella, dikau me ap tute, mo Dewel, un rikrau man ap tute.

⁵ Me kamau o Debleskro lab te sharell, man ap leste te rikrell, un man gar te darell. Hoi nashte krenn man i menshe?

⁶ O tselo diwes rissrenn le mire laba trujel. Jon rodenn, har nai dukrenn le man.

⁷ An pengro khatepen hi le tchiddo, lenn le man an o jak, un djinenn hako djapen mandar. Jon rodenn, har nai denn le man mulo.

⁸ Miro Dewel, kameh len kek phagi te dell lengro tchilatchepaske? De kal menshen an tiri choli khetne!

⁹ Dik, har bud diwessa hom me ap o naashepen! Le mire swa an i tcharo khetne! Pash tute hi le lauter pre-tchinlo an i liil.

¹⁰ Ap ko diwes, kai dau ap tute gole, hunte djan kolla pale, kai kamenn man te marell. Kawa hi, hoi djinau: Tu hal mantsa, miro Dewel.

¹¹ Me kamau o Debleskro lab te sharell. Awa, o baro Debleskro lab kamau te sharell.

¹² Ap leste dikau un rikrau man, un darau gar. Hoi nashte krenn man i menshe?

¹³ Miro Dewel, me dom man sowel, te parkrap man pash tute.

¹⁴ Tu lal man win dran o merepen. Awa, glan o perepen rikral tu mire herja pale, jaake te nai djiwap glan tute, miro Dewel, khetne kolentsa, kai djide hi.