Debleskri gili 49 - O Debleskro Drom 2021 (Sinte)

O brawlepen ap kai phub hi tchi moldo

¹ I gili o rajeske pral i gipangre. Kai gili hi jekestar dran i familja Korach.

² Tumer menshe an hake themma, shunenn mishto! Tumer lauter, kai ninna han, krenn tumare kanda pre!

³ An-dikle menshe un sawe, kai gar an-diklo hi, brawele un tchorwele, tumer lauter, shunenn!

⁴ Miro mui rakrell gosewe laba, un dran miro dji well kowa, hoi mishto haiwom.

⁵ Miro kand shunell ap gosewe laba, un hoi kolla kamenn te penell, kamau me tumende te sikrell pash o bashepen ap i dorjengri bashepaskri.

⁶ Hoske te darap an i tchilatche diwessa, kai kolla trul mande hi, kai mange tchilatchepen kamenna?

⁷ Jon tchiwenn pengro patsepen ap pengro brawlepen, un sharenn pen har brawele jon hi.

⁸ Kek menshes hi doha lowe, te nai ginell lo peskro phraleskro djipen o Deblestar, un peskro djipen witar gar.

⁹ I mensheskro djipen hi jaake kutch, te nai plaissrell lo les gar. An kek tsiro hi les doha te dell,

¹⁰ te nai djiwell lo hako tsiro, un hunte merell gar.

¹¹ Na-a, mer dikah: O gosewo hunte merell, jaake har o narwelo un o dinelo ninna. Un lauter, hoi len his, hunte mukenn le pale i wawarenge.

¹² Paskedo wenn le un atchenn an lengre mulengre khera hako tsiro, ninna te das i tsiro, kai dan le pengro them pengro lab.

¹³ Fothe brawelo i mensho ninna hi, job hunte merell jaake har i viecho ninna.

¹⁴ Dikenn har kolenge djala, kai hi jaake dinelo un kamenn pengro rakepen te shunell!

¹⁵ Har bakre djan le an o mulengro them. Lengro bakrengro, kai anell len ap o drom, hi o merepen. Sik well ko diwes, kai wenn o Debleskre menshe i raja pral kolende, kolengro mass tele merell an i phub, kai hunte atchenn le pash i mulende.

¹⁶ Miro djipen lell o Dewel win dran o merepaskri soor. Awa, job lell man pash peste.

¹⁷ Ma choje tut, te well jek brawelo, un leskro kheer bareder un shukeder wella!

¹⁸ Te merell lo, lell lo tchi peha. Leskro tselo brawlepen hunte atchell pale.

¹⁹ Ninna te sharell lo pes pral peskro shukar djipen, un i wawar penenn leske shukar laba, te djal leske mishto,

²⁰ hunte merell lo un djal kote, kai leskre mule phure hi, kolla, kai buder gar i momeli dikenna.

²¹ I mensho, kai haiwell gar, te nai atchell lo gar ap i phub, hunte merell har i vieche, ninna te his lo brawelo.