Debleskri gili 47 - O Debleskro Drom 2021 (Sinte)

O Dewel hi o baro rai pral i tsele themma

¹ I gili o rajeske pral i gipangre. Kai gili hi jekestar dran i familja Korach.

² Tumer menshe dran i tsele themma, denn an i wasta! Sharenn o Debles un denn leske bachteles gole!

³ O baro Dewel hi o pralstuno, lestar darenna lauter. Job hi o baro rai pral i tseli phub.

⁴ Job witsras menge i menshen dran wawar themma tel mare pire, un tchiwas men pral lende.

⁵ Job rodas menge o them win, un das les mende, te djiwas kote. Pral kowa ham bachtelo, mer, i tchawe o Jakobestar, kolen job bud kamell.

⁶ O Dewel djal pre pash peskri rajeskri beshepaskri, un i menshe denn bachteles gole un phurdenn an i phurdepaskri, har o baro Dewel pre djal.

⁷ Giwenn o Debleske! Giwenn un sharenn les, giwenn maro baro rajeske! Giwenn!

⁸ O Dewel hi o baro rai pral i tseli phub. Giwenn un sharenn les i giljentsa!

⁹ O Dewel hi o baro rai pral i tsele themma. O Dewel beshas pes ap peskri rajeskri beshepaskri, hoi leske kokres hi.

¹⁰ I raja pral i wawar themma wan khetne un hi kanna khetne o Debleskre menshentsa. Lengro Dewel hi o Abrahameskro Dewel. Leske hi kol tsele sorele ap i phub koi. Job hi pral hakeneste.