Debleskri gili 45 - O Debleskro Drom 2021 (Sinte)

I gili o pirneske un i pirnjake

¹ I bijabeskri gili jekestar, kai hi dran i familja Korach. Koi gili hi o rajeske pral i gipangre, te giwell pash o bashepen ap i shob-dorjengri bashepaskri.

² Miro dji hi pherdo shukar laba i giljake, hoi kamau te giwap miro baro rajeske. Miri tchip hi har i tchinepaskro jekestar, kai haiwell mishto laba te tchinell.

³ Tu hal shukeder har i wawar menshe. Dran tiro mui wenn latche laba. Tchatchepah o Dewel tchiwas peskri bacht ap tute, te atchell li hako tsireske ap tute.

⁴ Tchip tiro charo ap tiri rig, tu tchatcho mursh, un sike tiro railepen un soor!

⁵ Besh tut ap tiro grai! Dja trujel an o them un kre o tchatchepen soreles! Le i tchorwelengro koowa an tiro wast un kre, te lenn le pengro tchatchepen! Jaake krell tiri tchatchi mussi baro sorelo koowa.

⁶ De tire faile karje, te djan le an o dji kolendar, kai kurenn pen tuha. Jaake perenna i wawar themma glan tute.

⁷ Miro Dewel, tiri rajeskri beshepaskri atchell hako tsireske. Tu hal i tchatcho un latcho rai pral tire menshende.

⁸ Tu kameh o tchatchepen, un nai dikeh gar kolen glan tire jaka, kai o tchilatchepen krenna. Doleske rodas tut o Dewel, tiro Dewel, win un tchoras bud bacht pral tute win, budeder har pral hako wawar rajeste.

⁹ Tire ripja sungenn mishto pal Myrrhe, Aloe un Kassia. Bashepangre bashrenn tuke an tire rajengre khera, hoi shukar un kutch kerdo hi.

¹⁰ I bare rajengre tcha hi pash tute, un ap tiri tchatchi rig hi tiri pirni tardo, un ap late hi o latcheder sonakai.

¹¹ Shun miri tchai! Dik un shun mishto: Biste tire menshen un tiri tseli familja!

¹² Tu hal jaake shukar, te kamell tut o baro rai. Job hi tiro rai. Doleske dja ap i tchanga glan leste!

¹³ I menshe dran o foro Tirus wenn pash tute un anenn tuke shukar koowa. I brawele dran o tselo them wenna, un rodenn te dikess kamles ap lende.

¹⁴ I baro rajeskri tchai well dren, shukar un railo kerdo, un an-rido an sonakangre ripja.

¹⁵ Pral i kutch stakepangre anenn le lat pash o baro rajeste. Un pal late djan kol terne tcha, lakre mala, kolen anenn le pash tute.

¹⁶ Har djan le an o baro rajeskro kheer, denn i menshe gole i bachtjatar.

¹⁷ Miro rai, mu well ko tsiro, kai beshenn tire mursh tchawe ap o rajeskri beshepaskri, kai tire phure dada beshdo his; un tu kreh len rajen pral i tseli phub.

¹⁸ Me kamau tutar te rakrell, te prindjrenn tut ninna kol menshe, kai pal mende wenna. Jaake sharenn tut i menshe an hake themma kanna un hako tsiro.