Debleskri gili 42 - O Debleskro Drom 2021 (Sinte)

Miro Dewel, miro dji nashell pal tute

¹ I gili jekestar, kai hi dran i familja Korach. Kai gili hi o rajeske pral i gipangre.

² Har i wesheskri busjat bari trush hi pal shila pani, jaake nashell miro dji pal tute miro Dewel.

³ Awa, man hi trush pal o Debleste, pal ko djido Debleste. Kaana nai wau glan tute an tiro kheer, te dikap tut?

⁴ I wawar penenn ap mande hako diwes: “Kai hi tiro Dewel?” Doleske rowau o tselo diwes un haki rati; mire swa wan miro pipen.

⁵ Miro dji phagell an mande, har mukau mange an miro shero trujel te djal, har djom bud menshentsa ap o drom un anom len an o Debleskro kheer. Ap o drom sharam les bari goljah, te parkras men pash leste, un hams bud, kai giwan leske gilja i bachtelo djijeha.

⁶ Hoske rowell miro dji, un hi jaake pharo an mande? Ap miro Debleste kamau te dikell. Me djinau, te well i tsiro, kai sharau les, miro Debles, te was lo ap miri rig.

⁷ Kanna, mo Dewel, rowell miro dji. Doleske dikau ap tute kote, kai hom: an o them pash o pani Jordan, pash i berge Hermon un Misar.

⁸ Tire panja perenn bari sorjah un goljah tele. Jek baro pani pal o wawar djal pral mande wergel.

⁹ Pral o diwes bitchrell o baro Dewel mange peskro latchepen, un rati giwau leske gilja, un mangau o Debles, kai les miro djipen an o wast hi.

¹⁰ Me penau ap miro Debleste, kai hi mange har i sorelo kheer, kai nai khatrau man: Hoske bistral tu man? Hoske hunte rowap me? Kolla djan ap mande, kai mange o djipen phares krenna.

¹¹ Jon sanenn pral mande un putchenn mandar hako diwes: “Kai hi tiro Dewel? Kai atchell lo?” Lengro praassepen hi mange har i merepaskro dukepen an mire kokale.

¹² Me penau mange: Hoske roweh tu, miro dji, un hal jaake pharo an mande? Ap mo Debleste kamau te dikell. Me djinau, te well i tsiro, kai sharau les, miro Debles, te was lo ap miri rig.