Debleskri gili 39 - O Debleskro Drom 2021 (Sinte)

Miro Dewel, sike man, har tikno miro djipen hi!

¹ I gili o rajeske pral i gipangre, o Jedutun. O David kras kai gili.

² Me penom mange: Me dau ap mande jak, te rakrap kek tchilatchepen. Me tchiwom miro wast ap miro mui jaake rah har o tchilatcho his trul mande.

³ Un me rikrom miro mui, un homs pokones. Har penom tchi, witar kek latcho lab, was i daar an mande baro.

⁴ Un miro dji chatchras i dukatar, un miro shero was tato, un me nai rikrom man buder gar pale, un penom:

⁵ Baro Dewel, sike mande, har sik o djipen trujel hi, un kai miro merepen wella, te djinap, te nai atchau gar hako tsiro kai.

⁶ Miro djipen hi jaake tikno har i wast buchlo hi. Kowa hi har tchi pash tute. Har sorelo i mensho ninna tardo hi, leskro djipen hi har i ducho.

⁷ O mensho well un djal pale har i suni. O mensho budrella bud tchitcheske un krell bud gole trul tchi. Job anell peske bud brawlepen khetne, un djinell gar, koon kowa lella.

⁸ Kanna, miro rai, hoi well ap mande? Me dikau ap tute,

⁹ te less man win dran miri tseli doosh! Ma muk i dinelen pral mande te sal!

¹⁰ Me penau buder tchi. Miro mui atchell pandlo. Tutar well kowa, hoi pral mande was.

¹¹ Me mangau tut: Le tiro wast mandar krik. Te deh tu man dureder, hunte merap.

¹² Tu te deh o menshes i phagi, te anas lo doosh ap peste, palle djal lo jaake paash har i ripen, hoi chalo well i kirmestar. Awa, o mensheskro djipen hi tchi buder har i ducho.

¹³ Baro Dewel, shun miro mangepen! Un shun, har dau ap tute gole! Dik mire swa un rake mantsa! Me hom gar khere ap kai phub, djiwau har i wi-themari pash tute, jaake har ninna mire phure djiwan.

¹⁴ Muk man kanna, te lap newi soor, bis te hunte merap, un me gar buder hom.