Debleskri gili 37 - O Debleskro Drom 2021 (Sinte)

I bacht i tchilatchendar atchell gar

1 I gili o Davidestar.

¹ I gili o Davidestar. Ma choje tut pral i tchilatchende! Te djal kolenge mishto, kai krenn tchilatcho koowa, ma silwe ap lende!

² Jon hi har khass, hoi merell, te dell kek brishin, un har o senlepen, hoi atchell gar.

³ Dik ap o baro Debleste, te krell lo tuke latchepen! Un kre, hoi mishto hi! Atch an o them, un djib kolestar, hoi tire wastentsa budral!

⁴ Rode tiri bacht pash o baro Debleste, palle dell job tut lauter, hoi tiro dji kamella.

⁵ De tiro djipen an o wast o baro Deblestar, un pats ap leste! Palle krell job lauter mishto.

⁶ Un job mukell tiro tchatchepen pre te djal har o kham, un mukell tiro tchatchepen diklo te well har o kham mashkral o diwes.

⁷ Atch pokones un dik ap o baro Debleste, te well lo ap tiri rig! Ab gar chojedo pral koleste, kai leske mishto djala, ninna te hi les tchilatchepen an o shero.

⁸ Muk tele i choljatar! Ma choje tut pral o tchilatchepen, hoi i wawar krenna! Kowa nai anell tut jaake dur, te kreh tu ninna o tchilatchepen.

⁹ I tsiro wella, kai hi buder kek tchilatche ap kai phub. Kolla, kai ap o baro Debleste dikenna, te well leskro tsiro, kolenge hi palle o them.

¹⁰ An i tikno tsiro hi o tchilatcho buder gar koi. Un kote, kai job djiwas, hatseh les buder gar.

¹¹ I tchorwele lenn ko them. Kote hi len budeder bacht har doha.

¹² O tchilatcho kamell midjak koowa te krell ap koleste, kai an o tchatchepen tardo hi, un sikrell leske i danda.

¹³ O baro Dewel sal pral leste, job dikell leskro diwes te well.

¹⁴ I tchilatche lenn pengro charo, un hadenn pengro bogo, te marenn le i tchorwelen un kolen, kai nai kurenn pen gar, ninna lauteren, kai djan ap o tchatcho drom.

¹⁵ Jon denn pen pengro chareha kokres an pengro dji tchurje, un lengre boge wenna phagedo.

¹⁶ Ko tikno brawlepen, hoi koleskro hi, kai an o tchatchepen tardo hi, hi feteder har ko baro brawlepen bud tchilatchendar.

¹⁷ Kolengri soor well phagedo. O baro Dewel rikrell kolen, kai an o tchatchepen tardo hi.

¹⁸ O baro Dewel prindjrell i diwessa kolendar, kai ap leste shunenna pengro tselo djijeha, un lengro them atchell lenge hako tsireske.

¹⁹ An i tchilatcho tsiro mukell lo len gar, un an i boklo tsiro dell job len doha te chal.

²⁰ I tchilatche merenna, un kolla, kai o baro Debles gar kamenna, hi har kol shukar diwje blume, hoi sik tele merenn, un djan penge har i jagakro ducho, hoi pre djal.

²¹ O tchilatcho patsell peske lowe, un plaissrell gar pale. Kowa, kai an o tchatchepen tardo hi, krell peskro dji pre un della.

²² Kol menshe, ap kolende o baro Dewel peskri bacht tchiwas, lenn ko them. Kolla, ap kolende o baro Dewel i bibacht tchiwas, kolendar atchell kek.

²³ O baro Deblestar well, te djal i mursh o tchatcho drom. Pral koleste hi lo bachtelo.

²⁴ Ninna te perell lo, atchell lo gar tchiddo, o baro Dewel rikrell les ap peskro wast.

²⁵ Me homs terno un wom phuro. An ko tselo tsiro dikom me kekes kokres muklo, kai an o tchatchepen tardo hi; un kekes leskre tchawendar dikom, kai hunte mangas peske maro.

²⁶ O tselo tsiro krell job peskro dji pre un patsella, un ap leskre tchawende well o Debleskri bacht diklo.

²⁷ Muk o tchilatchepen pal tute, un kre o latchepen! Palle nai atcheh hako tsireske khere an o them.

²⁸ O baro Dewel kamell o tchatchepen un mukell peskre menshen gar kokres. Hako tsiro dell job jak ap lende. Kolla, kai kamenn o Deblestar tchi te djinell, merenna, ninna lengre tchawe un kolengre tchawe.

²⁹ Kolla, kai an o tchatchepen tardo hi, lenn o them, un djiwenn kote hako tsireske.

³⁰ Goswepen well dran o mui i latcho menshestar, un leskri tchip rakrell o tchatchepen.

³¹ O Debleskre laba hi an leskro dji. Un job perell gar o tchatcho dromestar tele.

³² O tchilatcho lell koles an o jak, kai an o tchatchepen tardo hi, te hatsell lo i drom, te nai dell lo les mulo.

³³ O baro Dewel mukell les gar an o tchilatcheskro wast. Te anenn le les glan i tchatchepangre, nai anenn jon kek doosh ap leste pre.

³⁴ Dik ap o baro Debleste, te well lo ap tiri rig! Un atch ap leskro drom! Palle hadell lo tut un dell tut ko them. Un tu dikeh, har wenn i tchilatche maredo.

³⁵ Me dikom i tchilatches, kai hadas pes pral i wawarende, un kras pes buchlo har i baro sorelo ruk.

³⁶ Un har wom i wawar kopo koi, his lo buder gar koi. Un me rodom les, un hatsom les gar.

³⁷ Kre jaake har kowa, kai shunell ap o Debleste peskro tselo djijeha! Un djib jaake har kowa, kai well kek doosh ap leste hatslo. Sawo mensheske djal mishto an ko tsiro, hoi wella.

³⁸ Kolla, kai o Deblestar tele peran, wenna lauter mulo dino. Un i tchilatchendar pengre tchawentsa un tchawengre tchawentsa atchell kek pral.

³⁹ O baro Dewel well ap i rig kolendar, kai ap leste rikrenna. An i pharo tsiro dell lo len soor.

⁴⁰ Un o baro Dewel hi pash lende tardo, un lell len win, awa, dran o wast i tchilatchendar lell lo len win. Jon nashenn pash leste, un job dell garda ap lende.